Bul úsh qylmystyń birinshisi Ázerbaıjan eliniń azamatyna qatysty bolyp shyqty. Ol qala syrtynda ornalasqan óndiristik bazalardyń birinen konteınerlerdi jalǵa alyp, onda bekire tuqymdas balyqtardy zańsyz saqtaǵan. Quqyq qorǵaýshylar odan 251 dana, ıaǵnı 1 tonna 150 kılo bekire tuqymdas balyqty tárkiledi. Azamat 40 tonnalyq konteınerlerde tutas saqtalǵan qyrýar balyqtyń óziniki emes ekenin aıtýda, áıtse de oǵan balyqtardy shetel asyrý kúdigi tańylyp otyr.
– Kúdiktige qatysty QR QK-niń 339-shy baby boıynsha sotqa deıingi tergep-tekserý amaldary júrip jatyr. Atalǵan bapta kórsetilgendeı, bekire tuqymdas balyqty zańsyz aýlap, ony saqtaǵan adam, sondaı-aq, saýda-sattyqqa shyǵaryp, tasymaldaǵan azamat 7 mıllıon teńge kóleminde aıyppul tóleıdi nemese 3 jylǵa deıin bas bostandyǵynan aıyrylady deıdi Mańǵystaý oblystyq IID JPQ tabıǵat qorǵaý polısııasy bólimshesiniń ınspektory Nesibek Taǵanııazov.
Mańǵystaýlyq tártip saqshylary Aqtaýda taǵy eki uıymdasqan qylmystyq topty qolǵa túsirdi. Olardyń biri arnaıy qurylǵylardyń kómegimen avtokólikterdegi baǵaly zattardy tonap kelse, kelesi top túrli-tústi metaldardy qabyldaıtyn oryndarǵa shabýyl jasaýmen aınalysqan.
Tarata aıtar bolsaq, Taraz qalasynan kelgen úsh jigit eki aı boıy avtokólikterdegi aqsha men baǵaly zattardy arnaıy «kod-grabber» dep atalatyn qurylǵynyń kómegimen tonaǵan. Bul apparat kóliktiń pýlti arqyly barlyq kodtardy oqyp, jazýǵa, sondaı-aq, alysta otyryp-aq zamanaýı quraldardy qoldanyp, kóliktiń esigin ashýǵa múmkindik beredi.
Quqyq qorǵaýshylardyń quryǵynan qutylmaǵan kelesi qylmystyq top 8 adamnan qurylǵan. Olardyń barlyǵy jergilikti azamattar. Olar Aqtaý qalasy men qala irgesindegi Munaıly aýdanynda ózderiniń qylmystyq isterin júzege asyryp kelgen.
Qazirgi tańda kólik tonaýshylarǵa qatysty QR QK 262-shi baby boıynsha qylmystyq is qozǵalsa, temir-tersek qabyldaıtyn oryndarǵa shabýyl jasaýshylar tergeý ızolıatoryna qamalǵan.
El arasy ury-qarysyz, tentek-telisiz turmaıtyny belgili. Der kezinde qımyldap, buzaqylardy qolǵa túsire bilgen tártip saqshylarynyń eńbegi eren.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
