Jeńimpazdardy marapattaý rásimine jáne festıvaldiń jabylý saltanatyna kelgen otandyq jáne sheteldik kıno juldyzdary, qazylar alqasy, festıval úmitkerleri jáne ózge de tanymal tulǵalar qyzyl kilem ústinde júrip ótti.
Úzdik týyndylar segiz negizgi nomınasııa boıynsha anyqtaldy. NETPAK uıymynyń arnaıy syılyǵy qyrǵyzstandyq rejısser Aqtan Arym Qubattyń «Kentavr» fılmine berildi. FIPRESSI (Halyqaralyq kınopressa federasııasy) syılyǵyn reseılik Borıs Hlebnıkovtyń «Arıtmııa» fılmi jeńip aldy. Odan bólek, «Úzdik qysqa metrajdy fılm» qosymsha nomınasııasy boıynsha Shabyt ýnıversıtetiniń bıylǵy túlegi Meıirjan Sandybaıdyń «It» mýltfılmi úzdik dep tanyldy. Festıvaldiń basty aqparattyq seriktesi «Habar» arnasynyń júldesi «Eshe odın den» (Qazaqstan) kınokartınasyna berildi.
«Úzdik er adam beınesi» nomınasııasyna ázerbaıjandyq akter Qurban Islamov laıyq dep tanyldy. Ol «Granatovyı sad» fılminde (Ázerbaıjan) basty róldi somdaǵan edi. Sondaı-aq, bul fılm Qazylar alqasynyń arnaıy syılyǵyna ıe boldy. Qazylar alqasynyń ekinshi syılyǵy «Pýtevaıa stansııa» fılmine (Vetnam) berildi. Al «Úzdik rejısserlik jumys» nomınasııasy boıynsha qyrǵyzstandyq «Kentavr» fılmi jeńimpaz atandy.«Úzdik áıel adam beınesi» úshin XIII "Eýrazııa" halyqaralyq kınofestıvaliniń júldesi «Moıa schastlıvaıa semıa» fılminiń (Grýzııa) aktrısasy Iıa Shýglıashvılıge berildi.
Festıvaldiń bas júldesin qazaqstandyq rejısser Sábıt Qurmanbektiń «Oralman» kartınasy jeńip aldy. Aýǵanstannan ózderiniń tarıhı otany Qazaqstanǵa kóship kelgen otbasynyń oqıǵasy baıandalatyn bul fılm sáýir aıynda Iranda ótken halyqaralyq «Fadjr» kınofestıvalinde «Azııanyń úzdik fılmi» júldesin alǵan.
Sonymen birge, saltanatty kesh barysynda QR Mádenıet jáne sport mınıstri Arystanbek Muhamedıuly Amerıkadan arnaıy kelgen Gollıvýd akteri Djon Malkovıchke «Kınoındýstrııany damytýǵa qosqan úlesi úshin» marapatyn tabystady. Shara sońynda kórermenderge tanymal fransııalyq rejısser Lıýk Bessonnyń «Valerıan jáne myń ǵalamshar qalasy» fılmi qazaq tilinde kórsetildi.
Eske sala ketsek, XIII «Eýrazııa» halyqaralyq kınofestıvali Qazaqstan astanasynda 22-28 shilde aralyǵynda ótti. Kınofestıvalge gollıvýdtyq juldyzdar Edrıan Broýdı, Nıkolas Keıdj, Djon Malkovıch jáne TMD elderiniń rejısserleri men kıno maıtalmandary keldi.
