Jármeńkede festıval ótkizgen - Qaraǵandy oblysynyń Aqtoǵaı jáne Nura aýdandary. Elimizge qymyzymen tanylǵan Aqtoǵaı óńiri tabıǵı sýsynyn ákelse, bıdaıly Nura aýdany baýyrsaqtyń túr-túrinen dám tatqyzdy. Jármeńkege barǵan astanalyqtar Qaraǵandy óńiriniń tátti-dámdilerinen aýyz tıip, qaryq boldy.
«Biz búgin qymyz shoý ótkizip, halyqqa tegin qymyz tarattyq. Aýyldan taza qymyzdy alyp keldik. Osy jerde birden kúbimen pisip te otyrdyq. Qazaqtyń qurt, irimshik, talqan, maı sııaqty taǵamdaryn ákelip, halyqty rıza qylyp jatyrmyz. Qala turǵyndary aýyldyń dámine alǵysyn jaýdyrýda. Búgin 200 lıtr qymyz ákelip edik, barlyǵyn úlestirip, dám tatqyzdyq», - deıdi Aqtoǵaı aýdany Qyzylaraı aýyldyq okrýginiń ákimi Sheker Tólepbekova.
Al Nura aýdanynan kelgen festıval uıymdastyrýshylarynyń biri, aýdandyq Jumyspen qamtý jáne áleýmettik baǵdarlamalar bólimi basshysynyń orynbasary Gúlnar Júpenova baýyrsaqtyń túr-túrin, jalpy unnan pisirilgen kóptegen ónimderdi ákelgenin aıtty.
«Búgin 150 keli taǵamdy tegin úlestirdik. Biz de balqaımaq, jent, qýyrylǵan bıdaı sııaqty kóptegen ulttyq taǵamdardy ákeldik. Kópshilik aýyz tıdi, sarqyt retinde de salyp berdik. Halyq rıza», - deıdi Gúlnar Júpenova.
Atap ótsek, Qaraǵandy jáne Jambyl oblystarynyń aýyl-sharýashylyǵy ónimderiniń jármeńkesi erteń de jalǵasady.
