Jýyrda ǵana Qazaqstan Respýblıkasy Aýyl sharýashylyǵy mınıstrliginiń Sý resýrstary komıtetiniń tóraǵasy Islam Ábishev bastaǵan sý salasynyń bir top mamany Aqmola oblysynyń Esil aýdanynda boldy. Memleket basshysy N.Nazarbaevtyń arnaıy tapsyrmasy boıynsha komıtet tóraǵasy kóktem kelse arnasynan tasyp, óńirdiń jáne Petropavl oblysynyń keı aımaǵyn da shaıyp ketetin ózen aýmaǵyn baqylap, quny 13 mlrd. teńgeni quraıtyn jańa jobany jergilikti bılik ókilderi jáne osy salanyń kánigi mamandarymen birge aqyldasyp qaıtty. Kartaǵa úńilip, ár jerge bir toqtap mańaıyn baqylaǵan mamandardyń sózinen uqqanymyz sý retteýish arqyly aldaǵy jyldary topan sýǵa tosqaýyl qoıylmaq. Iаǵnı, 1 mlrd. tekshe metr sýdy ustap qalatyn jańa qurylǵy jaqyn mańdaǵy, tipti, Petropavl oblysynyń keı aımaǵyn tasqyn sýdyń qaýpinen qorǵaýǵa múmkindik beredi.
- Árıne, bıyl ǵana oıǵa alyp, eskerip otyrmyz dep aıtýǵa áste bolmaıdy. Atalǵan joba alǵash 1975 jyly qolǵa alynǵan. Biraq, bárimizge belgili, ótken ǵasyrdyń 80-jyldary Keńes Odaǵynyń ekonomıkalyq hal-ahýalynyń tómendeı bastaǵan kezi bolatyn. Odan ári KSRO ydyrap, egemendigimizge qol jetkizdik. Dál sol es jıyp, etek-jeńimizdi jınaı bastaǵan ýaqytta bizge halyqtyń áleýetin kóterý basty maqsatqa aınalyp, myna joba keıinge qala berdi. Onyń ústine búgingideı tehnologııa da, mamandar da budan 20-25 jyl buryn bolmaǵandyqtan, sý retteýishti ornata salý da ońaı sharýa emes. Máselen, osy Aqmola oblysynyń Esil aýdany arqyly ótetin 16 km. temir jol, 70 kılometrge deıin sozylyp jatqan elektr jelisi, birneshe shaqyrym avtokólik joly men kópirdi buzyp aýystyrý memleketimizdi qanshama shyǵynǵa ushyratatynyn baǵamdaı berińiz. Al, qazir elimizdiń sý salasynda uzaq jyldyq tájirıbesi bar mamandary, geodezıster munyń ońtaıly sheshimin tapty,-deıdi I.Ábishev.
Qyrkúıek aıynyń sońyna deıin jan-jaqty talqylanyp, qazyǵy qaǵylatyn joba kelesi jyly tolyqtaı qolǵa alynbaq. Demek, aldaǵy jyldardan bastap aımaq turǵyndary alańsyz uıyqtap, kúnin kúlkimen, qýanyshpen ótkize alady degen sóz. Sondaı-aq, mamandar jınalǵan sýdy aýyl sharýashylyǵy jáne keleshekte ashylatyn óndiris oshaqtaryna paıdalanýdy josparlap otyr.
Ermurat NAZARULY,
Aqmola oblysy
