Dál mundaı nátıjege Qazaqstandyq joǵary bilim berý tarıhynda bir de bir oqý orny qol jetkizbegen eken. Grant sany boıynsha ózge oqý ordalarynyń ishinde kósh bastap turǵan Ulttyq ýnıversıtettiń mundaı nátıjege qol jetkizýi talapkerlerdiń sanaly ári maqsatty tańdaýyn, oqý ornyna degen qoǵamnyń joǵary senimin aıǵaqtaǵandaı.
Bıyl ýnıversıtetke túsýshiler tehnıkalyq jáne jaratylystaný-ǵylymı baǵyttaǵy mamandyqtarǵa basym tańdaý jasaǵan. Sondyqtan eń úlken baıqaý radıotehnıka, elektronıka jáne telekommýnıkasııalar, aqparattyq júıeler, avtomattandyrý jáne basqarý, standarttaý, sertıfıkattaý jáne metrologııa, bıotehnologııa syndy mamandyqtar boıynsha júrgizilgen. Sondaı-aq, aýdarma isi, halyqaralyq qatynastar, quqyqtaný, qarjy, esep jáne aýdıt, ekonomıka jáne halyqaralyq quqyq mamandyqtary talapkerler arasynda úlken suranysqa ıe bolǵan. Magıstratýra men doktorantýraǵa túsýge nıet bildirgender arasyndaǵy baıqaý da óte joǵary bolǵanyn aıta ketý kerek. Keıbir jekelegen mamandyqtar boıynsha bir orynǵa 20-dan asa adam úmitker bolǵan.
Álemniń úzdik 250 joǵarǵy oqý orny qataryna engen, elimizdegi bilim, ǵylym jáne ınnovasııanyń jetekshi ortalyǵy bolyp tabylatyn QazUÝ dúnıejúzindegi áıgili joǵary oqý oryndarymen qosdıplomdy bilim baǵdarlamalaryn júzege asyrýdy, aǵylshyn tilinde bilim berýdi jáne halyqaralyq yntymaqtastyqty qarqyndy damyta otyryp, jumys berýshilerdiń talabyn eskerý nátıjesine baǵyttalǵan basqarýdyń aldyńǵy qatarly ádisterin, jańa oqý baǵdarlamalary men tehnologııalardy engizýde. Ýnıversıtet tabaldyryǵyn endi attaǵaly otyrǵan birinshi kýrs stýdentteri tek bilim alyp qana qoımaı, biregeı kampýsta tabysty oqý men shyǵarmashylyq múmkindikterin júzege asyra almaq.
Mıra BAIBEK,
«Egemen Qazaqstan»
ALMATY
