Ulttyq akademııalyq kitaphanada ótken kezdesýdiń maqsaty táýelsiz elimizdiń biregeı jeńisiniń, halyqaralyq arenadaǵy jetistiginiń biri, tórtkúl dúnıe kóz tikken dúnıejúzilik basty oqıǵa – EKSPO-2017 halyqaralyq mamandandyrylǵan kórmesine qoldaý kórsetý. Osynaý aıtýly oqıǵaǵa oraı, ońtústikqazaqstandyq qalamgerler astanalyq oqyrman qaýymmen Elbasynyń «Bolashaqqa baǵdar: rýhanı jańǵyrý» maqalasyn talqylap, syr-suhbat quryp, oı bólisti.
«Rýhanı jańǵyrý – bolashaqtyń kepili» atty is-sharaǵa bas qaladan meıman retinde belgili tulǵalar Orazkúl Asanǵazy, Ǵarıfolla Esim, Myrzageldi Kemel, Qalqaman Sarın, Gúlǵaısha Saǵıdolla qatyssa, kúngeılik rýhanı toptyń basy-qasynda Erkinbek Turysov, Marhabat Baıǵut, Hanbıbi Esenqara, Áselhan Qalybekova, Baqytjan Aldııar, Dáýren Aımanbetov jáne Muqaǵalı Kenjetaıuly boldy. Keshti aqyn Qabylbek Tóretaı júrgizip otyrdy.
Jıynda sóz bastaǵan oblys basshysy Janseıit Túımebaev Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy jaıly oıyn bildirip, tusaýy kesilip otyrǵan kitaptar kórmesindegi árbir shyǵarmaǵa erekshe toqtalyp ótti.
«Biz kezinde erikti, eriksiz alystap ketken óz rýhanı qundylyqtarymyzǵa qaıta oralyp jatqan jurtpyz. «Rýhanı jańǵyrý» sonyń kórinisi. Qazirgi kezde rýhanı jańǵyrý aıasynda ádebıet máselesine qatysty óreli oılar ortaǵa salynyp jatyr. Árbir óńir úshin ádebı ortanyń shyǵarmashylyq áleýetin kóterý olarǵa tyń serpin beredi. Aımaqta túrli respýblıkalyq deńgeıdegi mereke, aıtýly kúnderge oraı, sondaı-aq, ólkeni tanytý maqsatynda da túrli kitaptar shyǵarylyp turady. Búgin tusaýy kesilgeli otyrǵan eki kitap soǵan dálel», dedi ol.
Sonymen, «Jahan tanyǵan jeti tulǵa» kitaby jaıly tolyǵyraq tarqatsaq, onyń ózi bólekshe bitimdi, mazmuny men mańyzy ózgeshe týyndy. Onda jan-jaqty tanyǵan, kúlli jer júzi kemeńgerler retinde moıyndaǵan, adamzattyń, álemdegi mereıli memleketterdiń taǵdyry men tarıhynda teńdessiz ról atqarǵan jáne atqaryp kele jatqan jarqyn da jasampaz tulǵalar beınelengen. Jeti alyp ta – aıryqsha alyptar, qaıtalanbas qubylystar. Olar: Nursultan Nazarbaev, Djordj Vashıngton, Mahatma Gandı, Ýınston Cherchıll, Mustafa Kemal Atatúrik, Sharl De Goll jáne Lı Kýan Iý. Kitapta «Ǵıbrat ǵumyr úzdikteri» degen taqyryppen tıtan tulǵalardyń árqaısysyna mánisi tereń minezdemeler berilgen. Árıne, olardyń ortasynan oıyp turyp oryn alǵan Uly Dala perzenti, Elbasy Nursultan Ábishuly Nazarbaevtyń táýelsiz Qazaq elin qalyptastyrýdaǵy qıyn da kúrdeli kezeńderden jol taýyp shyqqandyǵy aıryqsha baıandalady. Avtory Abaı Eskendirov 656 betten turatyn bul kitapty 4 jylda jazyp shyqqan.
Al «Tulǵa. Táýelsizdik. Tarıh» – «Lıchnost. Nezavısımost. Istorııa» kitaby úsh bólimnen turady. Atalǵan týyndydaǵy «Ordabasyǵa oralý» degen alǵashqy bólimde Elbasynyń qasıetti mekenge taban tiregeni týraly tolǵanatyn tustar jan-jaqty qamtylǵan. Kitaptyń ekinshi bóliminde Elbasymyzdyń shetel basshylarymen ońtústiktegi kezdesýleri sátti sýretterimen áńgimege arqaý bolǵan. Al úshinshi bólimde Memleket basshysynyń óńirge 1991 jyldan bastalǵan saparlary jan-jaqty baıandalady. Basylymǵa taıaýdaǵy ońtústik óńirine jasaǵan sáýirdegi sapary da engizilip otyr. Kitap eki tilde shyqqan.
Aıgúl SEIIL,
«Egemen Qazaqstan»
