Forýmǵa jınalǵandardy quttyqtaǵan Memlekettik hatshy Gúlshara Ábdiqalyqova Elbasy Nursultan Nazarbaevtyń «Qazaqstan-2050» Strategııasynda áleýmettik qaýipsizdik pen azamattardyń ál-aýqatyn arttyrý máselelerine basa nazar aýdarylǵanyn atap ótti. Osy oraıda ol Qazaqstanda áleýmettik damytýdyń 2030 jylǵa deıingi tujyrymdamasy qabyldanǵanyn, soǵan sáıkes áleýmettik salalardy damytý maqsatynda memleket tarapynan kómek kórsetilip, júıeli jumys júrgiziletinin málimdedi.
Memlekettik hatshy zamanaýı jahandyq syn-qaterler memleketter aldyna áleýmettik saıasatqa qatysty jańa talaptardy kóldeneń tartyp otyrǵanyn atap kórsetti. Onyń aıtýynsha, BUU-ǵa múshe elder 2030 jylǵa deıingi ornyqty damý maqsattaryn qabyldady. Álemdik tájirıbe kórsetip otyrǵandaı, memleketter azamattardyń óz múmkindikterin kedergisiz, al áleýetterin keńinen paıdalanýyna, eńbek naryǵynda meılinshe uzaǵyraq qalýyna jaǵdaı jasaýy tıis. Bul úshin túrli ádister men tetikter qoldanylady: qaıta oqytý, ońaltý baǵdarlamalary, jumys kúshiniń jınaqylyǵyn yntalandyrý, eńbek jaǵdaıyn jaqsartý jáne t.b.
«Búginde Qazaqstan úshinshi jańǵyrýdy júzege asyryp jatyr. El aldyna adamı kapıtaldyń sapasyn jáne básekege qabilettiligin arttyrýǵa jaǵdaı jasaý, sondaı-aq barlyq qazaqstandyqtardyń turmys sapasynyń joǵary standarttaryna qol jetkizýin qamtamasyz etý jónindegi mindetter qoıyldy», – dedi G.Ábdiqalyqova.
Memlekettik hatshy 2009 jyly arnaýly áleýmettik qyzmetter týraly zań qabyldanǵan soń elimizde áleýmettik qyzmetter kórsetý júıesin jańǵyrtý qolǵa alynǵanyn sóz etti. Onyń negizgi baǵytynyń biri – áleýmettik sala eńbekkerleri ınstıtýtyn qalyptastyrý jáne damytý. Memlekettik hatshynyń pikirinshe, atalǵan mamandyqtyń mańyzy men qoǵamdaǵy orny erekshe. Sondyqtan, áleýmettik qyzmetkerdi qarapaıym kútýshi sekildi jumysshy degen túsinikten arylý kún tártibinde tur.
G.Ábdiqalyqovanyń sózine súıensek, qazirgi jaǵdaıǵa beıim mamandar ázirleý de mańyzdy mindet sanalady. Memlekettik hatshy áleýmettik qyzmet salasyndaǵy zamanaýı jańalyqtardy engizgen sapaly baǵdarlama kerektigine toqtaldy. Sondaı-aq forýmnyń kún tártibine áleýmettik saladaǵy menedjment, áleýmettik qyzmetkerlerdi daıarlaý jáne olardyń biliktiligin arttyrý, kommersııalyq emes uıymdardyń arnaýly áleýmettik kómek kórsetý isine atsalysý aıasyn keńeıtý, eriktilik pen qaıyrymdylyqty qoldaý tárizdi ózekti máseleler engen.
Memlekettik hatshynyń aıtýynsha, qazirgi tańda Qazaqstanda 20 myńǵa jýyq áleýmettik qyzmetker bar. Elbasynyń «Bolashaqqa baǵdar: rýhanı jańǵyrý» atty maqalasynda «Maqsatqa jetý úshin bizdiń sanamyz isimizden ozyp júrýi, ıaǵnı odan buryn jańǵyryp otyrýy tıis. Bul saıası jáne ekonomıkalyq jańǵyrýlardy tolyqtyryp qana qoımaı, olardyń ózegine aınalady», dep jazǵanyn atap ótti G.Ábdiqalyqova.
Jıynǵa qatysqan Premer-Mınıstrdiń orynbasary Erbolat Dosaev forýmnyń mańyzdylyǵyna toqtalyp, Premer-Mınıstr Baqytjan Saǵyntaevtyń quttyqtaý hatyn oqyp berdi. «Árbir tórtinshi qazaqstandyq áleýmettik qamsyzdandyrý júıesimen qamtylǵan. Ataýly jumystyń tıimdi nysandary men ádisteri engizildi. Áleýmettik mekemelerdiń jańa túrleri qurylyp, áleýmettik qyzmet kórsetý túrleri keńeıtilip otyr. Bul jumys áleýmettik qyzmetkerlerdiń, olardyń joǵary kásibıligi jáne keremet adamı qasıetteriniń arqasynda jasalyp keledi. Qazirgi tańda áleýmettik qorǵaý salasy belsendi jańǵyrtyldy» delingen Premer-Mınıstrdiń quttyqtaýynda.
Sonymen qatar, Úkimet basshysy óz quttyqtaýynda áleýmettik jáne kásipkerlik ıdeıalaryn, qaıyrymdylyq jáne eriktilik ınstıtýttaryn ilgeriletýge, halyqty áleýmettik qorǵaý salasyna ınnovasııalyq tehnologııalardy belsendi engizýge jáne bıznesti tartýǵa jaǵdaı jasaýǵa nıetti ekenin jetkizgen. Premer-Mınıstr bul ádister turǵyndardyń, kómekke, erekshe kútim men qamqorlyqqa zárý adamdardyń ómir súrý sapasyn jaqsartatynyn atap ótken.
Eńbek jáne halyqty áleýmettik qorǵaý mınıstri Tamara Dúısenovanyń aıtýynsha, jergilikti basqarýshy mekemelerdegi áleýmettik qyzmet salasynda qaıta jańǵyrtý júrgizý qajet. T.Dúısenova aǵa býynnyń áleýmettik qyzmetke qatysty qatyp qalǵan túsinigi jastarmen jáne jas otbasylarmen birlese jumys isteýge kedergi keltirip otyr. Sondyqtan, osy salanyń deńgeıin kóterýdiń mańyzy erekshe. Sonymen birge áleýmettik qyzmet osy saladaǵy búkil baǵdarlamalar men jergilikti jerdegi jumyspen qamtý baǵdarlamalaryna muryndyq bolmaq.
Alqaly jıynǵa alystan at terletip kelgen Halyqaralyq áleýmettik qamsyzdandyrý qaýymdastyǵynyń bas hatshysy Hans-Horst Konkolevskı Qazaqstannyń osy salada atqaryp jatqan jumystaryna oń baǵasyn berdi. BUU-nyń Qazaqstandaǵy turaqty úılestirýshisi Norımasa Shımomýra elimizdegi áleýmettik baǵdarmalardyń sapasy joǵary ekenin málimdedi.
Forým aıasynda «Qazaqstanda júzege asyp jatqan úzdik áleýmettik jobalar» respýblıkalyq kórmesi uıymdastyryldy. Oǵan elimizdiń barlyq aımaǵynan 155 ótinish kelip túsip, sonyń 20-sy úzdik shyqqan. Bul kórmeniń maqsaty – qıyndyqqa tap bolǵan azamattardyń máselesine qoǵam nazaryn aýdartý. Jıyn sońynda ózgelerden oq boıy ozyp shyqqan úsh joba eń úzdik dep tanylyp, baǵaly syılyqtarmen marapattaldy.
Abaı Asankeldiuly,
«Egemen Qazaqstan»
