Mınıstrdiń dereginshe, jalpy respýblıka boıynsha 6 956 mektep nemese 98 paıyzy jelige qosylǵan, alaıda sekýndyna 4 megabıtpen keń jolaqty ınternetke tek 34 paıyzy qosylǵan. Sońǵy eki jylda atalǵan kórsetkish 9 paıyzǵa ulǵaıtylǵan.
Bilim jáne ǵylym mınıstri Erlan Saǵadıev qazirgi tańda ınternet bilim berý júıesin damytýdyń mańyzdy elementi ekenin atap ótti.
Búginde Qazaqstan mektepteriniń basym bóliginde sıfrly oqytý resýrstary qoljetimdi, ıaǵnı bul rette 80 myńnan astam materıal bar. Olardyń ishinde úsh tilde ınteraktıvti jáne mýltımedııalyq sabaqtar, vıdeolardy aıtýǵa bolady, dedi mınıstr. 
Olar oqytý prosesin tolyqtyratyn materıaldar, ásirese shaǵyn jınaqty mektepter úshin óte qajet. Sondaı-aq elektrondy kúndelikterdi tutastaı paıdalanýdy qamtamasyz etý mańyzdy. Osynyń barlyǵy úshin joǵary jyldamdyqty ınternet kerek.
Aıtqandaı, búgin Premer-Mınıstr Baqytjan Saǵyntaevtyń tóraǵalyǵymen ótken Úkimet otyrysynda aýyldyq eldi mekenderdi keń jolaqty ınternet jelisine qosýdy qamtamasyz etý Jobasy qaraldy.
Dınara BITIK,
«Egemen Qazaqstan»
