Eńbek áýletteri arasynda ótkizilgen saıystyń jeńimpazdary bolyp Qazaly aýdanyndaǵy Jadıevterdiń pedagogtar otbasy (36 adam bar, barlyq pedagogtyq eńbek ótili 812 jyldy quraıdy), temirjolshylar Naýryzbaevtar januıasy (8 adam, barlyǵy 236 jyl jumys ótili), Aral aýdanynan dárigerler Qorǵambaevtar otbasy (4 adam, 78 jyl jumys ótili), jalaǵashtyq sý sharýashylyǵy salasynyń qyzmetkerleri Tabynbaevtar (8 adam, 98 jyl jumys ótili), jáne Shıeli aýdanynan omartashy Toqtybaevtar otbasy (10 adam, jalpy jumys ótili 80 jyl) tanyldy.
Saltanatty sharaǵa oblys ákimi Qyrymbek Kósherbaev qatysyp, jınalǵandardy quttyqtap, Syr óńiri qashanda adal eńbekkerlerimen aty shyǵyp kelgenin atap ótti.
Qyzylorda oblysynda «dala akademıgi» Ybyraı Jaqaev bastaǵan 102 Sosıalıstik Eńbektiń Eri bolǵan. Er azamattarmen birge Shyrynkúl Qazanbaeva, Salıma Jumabekova, Ulbala Altaıbaeva, Jadyra Taspambetova, Zakıra Erjanova sekildi Eńbek Erleri óskeleń urpaqqa ónege. Táýelsizdik jyldary olardyń qataryn ataqty jerlesterimiz kásipker Abzal Eralıev jáne hırýrg Iýrıı Pıa tolyqtyrdy.
«Biz elimizdiń damýyna úles qosqan eńbekkerlerimizdiń eńbegin baǵalaımyz. Aıta keteıik, Elbasynyń 2013 jylǵy qarasha aıyndaǵy Buıryǵyna sáıkes, osymen 4-shi jyl «Eńbek kúnin» atap ótýdemiz», - dedi oblys ákimi.
Barlyq qatysýshy otbasylar alǵys hattarmen marapattalyp, baǵaly syılyqtarǵa ıe boldy.
Sondaı-aq, forým aıasynda «Eńbek joly» respýblıkalyq forýmnyń jergilikti óńirde ótken saıysynyń jeńimpazdary, «Eń úzdik eńbek dınastııasy» nomınasııasymen Márııamkúl Tuńǵyshmuratova, «Jumysshy jastardyń jetekshisi» nomınasııasymen Shárkúl Esqoja, «О́nerkásiptegi eń jas jumysshy» nomınasııasymen Raýshan Jumasheva marapattaldy.
Merekelik is-shara konserttik baǵdarlamamen jalǵasty.
