№4 Kúrshim orta mektebi aýdandaǵy eń irgeli bilim oshaǵy sanalady. Munda ótken oqý jylyn 489 oqýshy aıaqtap, olardyń ishinde 96 úzdik, 160 oqýshy ekpindi atanǵan bolatyn. Al 11-synypty bitirgen 35 túlektiń 23-i UBT-ǵa qatysyp, 16 bala joǵary oqý ornyna tústi, 15 túlek kolledj stýdentteriniń qataryn tolyqtyrdy. Osy aıtýly kúni bul mektepte taǵy bir ǵıbratty shara ótip, munyń ózi mektep ustazdary men oqýshylarynyń shynaıy rızashylyǵyna sebepker bolǵan edi.
Qazaq KSR halyq aǵartý isiniń úzdigi, Qazaqstan Respýblıkasynyń eńbek sińirgen qyzmetkeri, «Qurmet belgisi» ordeniniń ıegeri, Kúrshim aýdanynyń qurmetti azamaty, belgili pedagog Qýanyshbaı Sembaevtyń esimi kópke áıgili. Sanaly ǵumyrynyń 45 jylyn ustazdyqqa arnaǵan ardager tálimger osy ómir jolynyń 42 jylyn bilim salasynyń basshylyǵynda ótkizgen-di. Aýdandaǵy birneshe mektepke dırektor bolyp, keıinnen aýdandyq halyq aǵartý bóliminiń meńgerýshiligine taǵaıyndalǵan Q.Sembaev jaýapty qyzmetti 17 jyl boıy minsiz atqardy.
Parasatty pedagogtardyń otbasynda tárbıelengen urpaǵy matematıka pániniń daýsyz bilgiri atanǵan ákelerine arnap kabınet jabdyqtap berýdi maqsat tutqan eken. Sol nıettiń oryndalýy búgingi sátti kúnge dóp kelip, qart ustazdyń ózi 15 jyl boıy jas býynǵa dáris bergen №14 matematıka kabıneti barynsha uqypty jabdyqtalyp, jańaryp-jańǵyryp, esigin aıqara ashty. Bul bólme budan bylaı «Ardager ustaz Qýanyshbaı Sembaev atyndaǵy kabınet» dep atalady.
– Osy bir oı bizdi kópten beri mazalap júrgen bolatyn, deıdi qarııanyń úlken uly, UQK Shekara qyzmetiniń ardageri, zapastaǵy polkovnık Qaırat Sembaev. – Aqyrynda aǵaıyndy beseýimiz bir kelisimge keldik. Birlese qarjy jınap, ákemizdiń atyna bir kabınet jabdyqtap berýge sheshim qabyldadyq. Bári zańdy da resmı bolýy úshin aldymen osy №4 Kúrshim orta mektebi dırektorynyń atyna ótinish jazdyq. Bul hatymyz mekteptiń pedagogıkalyq keńesinde talqylanyp, biraýyzdan qoldaýǵa ıe boldy. Sonymen birge ár oqý jyly aıaqtalǵan saıyn osy mekteptiń matematıka pánin úzdik bitirgen bir túlegine 100 myń teńge kóleminde syıaqy berip otyrmaq bolǵan edik. Bul usynys ta qabyldandy. Biz qajetti materıaldardy jetkizip berip turdyq, jóndeý-jańǵyrtý jumystaryna da atsalystyq. Mektep ujymy barynsha kómektesip, kabınettiń kóńildegideı shyǵýy úshin aıanbaı kúsh jumsady. Osyndaǵy barsha sharýaǵa tııanaqty da tabandy basshylyq jasaǵan mektep dırektory Oralbek Seıitqazınge aıtar alǵysymyz zor.
Kabınettiń ashylý saltanatyna ardager ustazdyń ózi de zaıybymen birge qatysyp, osy sharaǵa muryndyq bolǵan uldaryna, kezinde ózi basshylyq jasap, tárbıelegen mektep ujymyna shyn kóńilden shyqqan ákelik alǵysyn arnady. Osynaý bilim ordasynyń qashanda bıikten kórinip, tabystarǵa jete berýine tebirene turyp tilektestik bildirdi.
Qarttyń uldary, burynǵy áskerı qyzmetkerler Qaırat pen Janbolat óz tilekterin ortaǵa sala kele, ákeleri salyp ketken sara joldy jas urpaqtyń laıyqty deńgeıde jalǵastyryp, mektep bedelin bıiktete berýlerine tilek bildirdi. Eńbek ardagerleri M.Qasymbaeva, S.Tákenova, mektep ustazdary T.Maıqynova, N.Pels quttyqtaý tilekterin arnap, qart tálimgerge uzaq ǵumyr, baıandy baqyt tiledi.
– Prezıdentimizdiń «Bolashaqqa baǵdar: rýhanı jańǵyrý», sondaı-aq óńirimizde jolǵa qoıylǵan «Týǵan jerge – taǵzym» baǵdarlamalary aıasyndaǵy kóptegen aksııalardyń qataryna búgingi shara da qosylyp otyr, – dedi osy kezdesýdi tujyrymdaǵan mektep dırektory O.Seıitqazın. – Jas býynǵa ónege bolarlyqtaı maǵynaly shara ekendigi daýsyz. Aǵaıyndy Sembaevtardyń bul isterin qýana quptadyq jáne osyndaı ıgi sharalar odan ári jalǵasyn taba bersin dep tileımiz. Kabınet jabdyqtaý dástúri burynnan bar, al úzdik oqýshyǵa syıaqy taǵaıyndap otyrǵandaryńyz – bul óńirdegi jańa bastama, onyń keleshekte shákirtterdi jaqsy oqýǵa yntalandyra túseri sózsiz. Sondyqtan da bárimizge úlgi bolǵan ardager aǵamyzǵa, ol kisige laıyqty urpaq bolyp otyrǵan sizderge kóp rahmet!
Sembaevtar áýleti kabınetti jyl saıyn jóndep, jańartyp otyrýǵa ýáde berdi.
Hasen ZÁKÁRIIа,
jýrnalıst
Shyǵys Qazaqstan oblysy,
Kúrshim aýdany
