Kaspıı teńizi máselelerin sheshý jáne Kaspıı mańy aımaǵynda birtutas bilim berý keńistigin qurý maqsatynda 1996 jyly jumysyn bastaǵan Assosıasııaǵa qazir 55 ýnıversıtet múshe. Ázerbaıjan, Iran, Reseı, Túrkimenstan men Qazaqstannyń joǵary oqý oryndarynyń rektorlary bas qosqan jıynǵa H.Dosmuhamedov atyndaǵy Atyraý memlekettik ýnıversıtetiniń rektory, professor Abzal Táltenov tóraǵalyq etti.
Plenarlyq májilisti bastaǵan Atyraý oblysynyń ákimi Nurlan Noǵaev: «Tarıhı taǵdyrlas memleketterdiń ejelden qalyptasqan dostyq qarym-qatynasyna osyndaı sharalar tyń serpin beredi, - dedi. - Munda túrli salalardaǵy keleli máseleler kóterilip, ortaq sheshimin tabady dep senemin. Qazaq elinde qoǵamdyq kelisim, saıası turaqtylyq pen ultaralyq tatýlyq saltanat qurǵan. Bul - Elbasymyzdyń sarabdal saıasatynyń jemisi. Qoǵamymyz ósip-órkendesin desek, básekege qabiletti bolýymyz kerek. Osy oraıda joǵary oqý oryndarynyń atqarar roli zor bolmaq. Kaspıı mańy elderi ýnıversıtetteriniń arasynda tyǵyz baılanys ornatýdyń mańyzy zor».
Kaspıı mańy elderi memlekettik ýnıversıtetteri qaýymdastyǵy - ashyq pikir alańy. On bes jyldan beri kóptegen ǵylymı-tájirıbelik konferensııalar men dóńgelek ústelder uıymdastyryldy, Kaspıı máselesi boıynsha zertteý jobalary jasaldy, ǵylymı jýrnaldar basylyp, birlesken stýdenttik olımpıadalar men ekspedısııalar ótti.
Assambleıa aıasynda plenarlyq májilisten bólek «Joǵary bilim berý salasyndaǵy jobalyq menedjment» rektorlar sammıti boldy. H.Dosmuhamedov atyndaǵy Atyraý memlekettik ýnıversıtetinde Iran mádenıeti men tili ortalyǵy ashyldy. Ýnıversıtetterdiń halyqaralyq jáne ǵylymı yntymaqtastyq menedjerlerine arnalǵan vorkshop uıymdastyryldy. Assosıasııanyń ǵylymı yntymaqtastyǵy men zertteýleri toǵysqan Kaspıı portaly jobasy tanystyryldy.
Baqytgúl BABASh,
«Egemen Qazaqstan»
ATYRAÝ
Sýretti túsirgen Erlan Altybaev
