Osy kúnge deıin baspasóz betterinde qarapaıym halyqtan bastap, lıngvıst-ǵalymdarǵa deıin óz pikiri men usynystaryn jetkizip keledi. Kóptegen jobalarmen tanys boldyq. Úshtildilikke kóshý úderisi jyldamdap, ǵylymymyz qaryshtap damıdy degen úmittemiz.
Ýaqyt synynan ótken ómirsheń latyn grafıkasyn qazirgi tańda álem halqynyń 80 paıyzy meńgergen eken. Álemdik aqparattyń 70 paıyzy osy tańbamen taratylatynyn, ǵylymnyń tili, halyqaralyq termınder, formýlalar da negizinen latyn áripterimen jazylatynyn eskerer bolsaq, jańa álipbı bizge zor múmkindikter týǵyzady.
Latyn grafıkasy boıynsha qazaq tilin oqý barysynda jas urpaq aǵylshyn tilin meńgeretini anyq. Sheteldikter úshin de qazaq álipbıi men tilin meńgerýi jeńildeıdi, ıaǵnı Qazaqstandy álemge tanymal etýge septigin tıgizedi. Bul – Qazaqstannyń dúnıejúzilik aqparattyq keńistikke yqpaldasýy, bizdiń barlyq sıfrlyq resýrstarymyz, mádenı muramyz álemde latyn grafıkasyn qoldanatyn barlyq paıdalanýshylarǵa, qazaq tilin meńgergen, alaıda kırıllısany bilmeıtin adamdar úshin qoljetimdi bolady.
Latyn álipbıiniń Elbasyna usynylǵan jańa jobasy Sh.Ýálıhanov atyndaǵy Kókshetaý memlekettik ýnıversıtetinde de jan-jaqty talqylanýda. Ásirese ǵalymdarymyz, til mamandary, kózi qaraqty, kókiregi oıaý jastarymyz latyn álipbıi tóńireginde tushymdy oı-pikirlerin bildirýde. Stýdent jastardyń latyn grafıkasyn engizý máselesin yqylaspen qabyldaǵanyn atap ótken oryndy. Birneshe tildi erkin meńgergen stýdentterimiz ınternet keńistigine erkin enýde jáne latyn grafıkasyn qoldanýdyń eshqandaı qıyndyq týdyrmaıtyndyǵyn ańǵaryp otyr.
«Jumyla kótergen júk jeńil», «Kóz – qorqaq, qol – batyr», dep dana halqymyz aıtqandaı, endi eki qoldy sybanyp, nyq qadammen alǵa basýdyń ýaqyty keldi!
Sábıt JÁMBEK,
Sh.Ýálıhanov atyndaǵy Kókshetaý memlekettik ýnıversıtetiniń professory
