Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy boıynsha elimizdegi kitaphana isiniń damý strategııasyn anyqtaý, kitaphana qyzmetkerleriniń biliktiligin kóterý, ózara tájirıbe almasý, ózara árekettestik arqyly birlesken jobalardy júzege asyrýdy maqsat tutqan basqosý aıasynda ashylǵan Latyn álipbıin úırený ortalyǵy Ulttyq kitaphananyń bas bolýymen A.Baıtursynuly atyndaǵy Til bilimi ınstıtýtymen, Almaty qalasy Tilderdi damytý basqarmasymen jáne ál-Farabı atyndaǵy Qazaq Ulttyq ýnıversıtetimen birlesip qurylǵan.
Ulttyq kitaphana dırektory Janat Seıdýmanov: «Ulttyq kitaphana qorynda 1929-1940 jyldar aralyǵynda elimizde latyn grafıkasymen shyqqan on myńnan asa kitap, sondaı-aq sol kezeńdegi birqatar basylymdar saqtaýly. Kitaphanamyzǵa keletin jylyna 1 mıllıonǵa jýyq oqyrmannyń jetpis paıyzy jastar bolsa, sol jastardyń Latyn álipbıin úırený ortalyǵyna bas suǵyp, tegin túrde qajetti bilim nárimen sýsyndaýyna bar múmkindikti jasadyq deýge bolady. Ortalyqta tórt birdeı mekeme mamandary kelýshilerge qajetti aqyl-keńesterin, baǵyt-baǵdaryn berip otyratyn bolady. Endi josparǵa sáıkes, latyn álipbıin úıretý, oqytý jumystary, Almaty shaharyndaǵy latyn qarpinde shyqqan kitaptardyń tusaýkeserleri bolashaqta osy Ortalyqta ótip turatyn bolady», deı kele, elimizdegi barlyq oblystyq kitaphanalarda osyndaı Latyn álipbıin úırený ortalyqtaryn ashý máselesi qolǵa alynatyndyǵyn jetkizdi.
Latyn álipbıin úırený ortalyǵynyń saltanatty ashylý rásiminen keıin elimizdegi barlyq oblystyq kitaphanalar basshylarynyń «Qazaqstan kitaphanalarynyń quqyqtyq jáne kadrlyq tuǵyrnamasyn jańǵyrtý» atty jyl saıynǵy arnaıy basqosýynda «TMD-ǵa qatysýshy memleketterge arnalǵan modeldi kitaphanalyq kodekstiń» 2016 jylǵy jańa redaksııasy, sondaı-aq, «Kitaphana isi týraly» zań jobasyna, «Aýyldyq kitaphanalardy mádenıet, aǵartý, bos ýaqyt ótkizý ortalyǵy retinde jańǵyrtý týraly erejeniń» jobasyna qatysty usynystar talqylanyp, «Qazaqstannyń kitaphana isi salasy mamandaryn sertıfıkattaý ortalyǵy týraly», «Qazaqstan Respýblıkasy Mádenıet jáne sport mınıstriniń 2017 jylǵy 17 shildedegi № 209 buıryǵy boıynsha qabyldanǵan Tıptik biliktilik sıpattamalardyń kitaphanalardyń zamanaýı qyzmetine sáıkestigi» taqyrybynda baıandamalar jasaldy.
Oblystyq kitaphanashylar jıynynda, sondaı-aq, «Týǵan ólkem» aqparattyq portalynyń tusaýkeseri ótip, keńes otyrysy aıasynda Qazaqstannyń kitaphana isiniń damý jetistikterine arnalǵan «Qazaqstan kitaphanalarynyń quqyqtyq jáne kadrlyq tuǵyrnamasyn jańǵyrtý» taqyrybynda kitap kórmesi uıymdastyryldy.
Mıra BAIBEK,
«Egemen Qazaqstan»
