Bıyl 7 oıyn ótkizgen quramamyz 6 oıynda jeńilip, tek bir ǵana matchta teń tústi. Qaqpamyzǵa 18 gol soǵyp, ózimiz qarsylas qaqpasyn nebári 4 ret dál kózdeppiz. Onyń ekeýin sońǵy eki oıynda «Qaırattyń» qosalqy komandasynda oınaıtyn Baýyrjan Turysbek soqty. Al jalpy mundaı tómen kórsetkish tek 2008 jyly tirkelgen edi. Sol bir sátciz ótken jylda Qazaqstan 8 oıynda jeńilis tapty. Mine, sodan beri segiz jyl boıy mundaı quldyraý bolmaǵan. Bul endi býyn almasýdyń kesiri me, joq álde bapkerdiń nasharlyǵynan ba?
Bapker demekshi qurama tizginin ustaǵan Aleksandr Borodıýktiń áli 2 jyldyq kelisimsharty bar. Iаǵnı quramany taǵy bir irikteý sıklinde jattyqtyrýy ǵajap emes. Alaıda bıylǵy tómen kórsetkishten keıin Qazaqstan fýtbol federasııasynyń basshylary bapkerdi aýystyrady dep kútken edik.
Jalpy, Qazaqstanǵa kelgeli beri bir oń nátıje kórsetpegen reseılik mamandy elimizde de ustap turǵan nendeı kúsh ekenin aıtý qıyn. «Qaırat» komandasynyń bapkeri bolysymen alǵashqy 4 týrda birde-bir jeńiske jetpegen maman, ornynan erte bastan qýylǵan bolatyn. Biraq, sonda da Qazaqstan fýtbol federasııasy Borodıýkti bas bapker etip taǵaıyndady. Gýs Hıddınk pen Dık Advokatqa kómekshi bolǵanynan basqa jeke-dara ózi kórine almaǵan mamanǵa qaraǵanda elimizde jibi túzý birneshe bilikti bapker bar edi.
2018 jylǵy álem chempıonatynyń irikteýin óte nashar ótkizgen soń, quramamyz kelesi joly mundaı olqylyqty qaıtalamaý úshin iske kiriser dep sheshtik. FIFA joldastyq kezdesýlerge belgilegen arnaıy kúndi quramamyz barynsha paıdalanyp qalýy tıis edi. Alaıda joldastyq kezdesý ótkizetin qarsylas tappaı dal bolyp qaldy. Shynyn aıtý kerek, bizdiń quramamen eshkim oınaǵysy kelmeıtindeı kórinedi. Alǵashqyda Reseımen joldastyq kezdesý ótkizetin Argentına quramasyn shaqyrýymyz múmkin delindi. Sóıtsek Argentına 14 qarasha kúni Reseı jerinde Nıgerııamen kezdesýdi josparlap qoıypty. Iá, quramynda Messı, Igýaın, Dıbala sekildi juldyzdar oınaıtyn Argentına bizdi neǵylsyn. Únemi qarsylas tappaı qalǵanda Qyrǵyzstan quramasyn shaqyrtatynbyz. Sońǵy joldastyq kezdesýde Qyrǵyzstannan jeńilip, Bishkekten masqaramyz shyǵyp qaıtqannan keıin Qazaqstan fýtbol federasııasy ol eldiń quramasymen oınaýdy tıimsiz dep sanady. Rasymen de, Azııa qurlyǵynyń ortańqoly sanalatyn Qyrǵyzstannan jeńilgenimiz kúlli qazaq jankúıeriniń shamyna tıdi. Osydan soń, barlyq jaǵdaıdy saralaı kele, Qazaqstan ulttyq quramasy Talǵardaǵy bazada oqý-jattyǵý jıyndaryn ótkizetin boldy. Eki birdeı joldastyq kezdesýdi de uıymdastyrdy. Qarsylas – Qazaqstan jastar quramasy. Kúletin jaǵdaı emes, árıne. Qazaqstan jastar quramasy talantty jastarǵa baı. Tipti, basty komandaǵa qarsylas bola alady.
Ermuhamed MÁÝLEN,
«Egemen Qazaqstan»
