Akademııa basshysy Darhan Qydyráli júrgizgen saltanatty sharaǵa Ázerbaıjan Respýblıkasynyń Qazaqstandaǵy elshisi Rashad Mammadov, Ázerbaıjan Ulttyq Májilisiniń (Mıllı Mejlıs) depýtaty Elman Nasırov, Túrki keńesi Aqsaqaldar keńesiniń múshesi Ádil Ahmetov jáne Qazaqstandaǵy Ázerbaıjan etnomádenı ortalyǵynyń tóraǵasy Ábilfas Hamedov qatysty. Sonymen birge, jıynda zııaly qaýym ókilderi, kórnekti ǵalymdar men Ázerbaıjannan jáne Túrkııadan kelgen tanymal jýrnalıster boldy.
«Kúni keshe Ázerbaıjan men Qazaqstannyń dıplomatııalyq baılanysyna 25 jyl tolǵanyn saltanatty túrde atap óttik. Sol sharada ázerbaıjandyq qaıratkerler, depýtattar Qazaqstan Prezıdentiniń Jarlyǵymen arnaıy medalmen marappattaldy. Ázerbaıjan Respýblıkasy men Qazaqstannyń qarym-qatynasyna dáneker bolatyn sondaı sharalardyń biri – Ázerbaıjan Respýblıkasy prezıdentiniń qoǵamdyq-saıası máseleler boıynsha kómekshisi, professor Álı Gasanovtyń «Kaspıı-Qara teńiz basseıni jáne Ońtústik Kavkazdyń geoekonomıkasy: Ázerbaıjannyń energetıkalyq saıasaty» atty qazaq tiline aýdarylǵan kitabynyń tusaýkeseri. Hazar teńiziniń jaǵasyndaǵy memleketterdiń yntymaqtastyǵy týraly kitapty bizdiń akademııanyń qyzmetkerleri asa yjdahattylyqpen aýdaryp shyqty. Eki el arasyndaǵy ortaq mańyzdy jobalardyń da sıpaty aıqyn kóringen. Bul kitap aımaqtanýshy, geoekonomıkamen aınalysatyn jas mamandar úshin óte paıdaly bolady dep esepteımin», dedi Túrki akademııasynyń basshysy Darhan Qydyráli.
Tusaýkeserde sóz alǵan Ázerbaıjan Respýblıkasynyń Qazaqstandaǵy elshisi Rashad Mammadov: «Eger biz elimizde naqty Ázerbaıjan men Qazaqstandy zertteıtin mamandar bar desek, bir-birimizdi óte jaqyn bilemiz desek qateleser edik. Aldyńǵy tolqyn aǵalarymyz jaqsy biledi, Keńes úkimeti óz múddesi úshin odaqtas respýblıkalardy zertteıtin mamandar daıarlady. Endi biz táýelsiz el bolǵan kezde saıası qarym-qatynastyń názik tustaryn jaqsy biletin, bir-birimizdi tolyq túsinetin bilikti mamandardy ózimiz tárbıelep shyǵarýymyz kerek. Álı Gasanovtyń bul kitaby sol úlken dańǵyldyń alǵysharty dep esepteımin. Bul kisi Ázerbaıjan Respýblıkasyndaǵy geosaıasat ǵylymynyń negizin qalaýshy. Álı Gasanovqa deıin bul salany zerttegen maman bolǵan joq. Túrki akademııasynyń sońǵy kezderi bundaı kitaptardy baýyrlas halyqtardyń tiline aýdara bastaýy úlken eńbek. Sebebi bul kitaptyń ne ekenin jaqsy túsinetin, erteńin oılaıtyn zerdeli halyqtyń isi bop sanalady. Sondyqtan eki el arasyndaǵy qarym-qatynasty barynsha qoldap otyrǵan Nursultan Nazarbaevqa, Túrki akademııasynyń basshysy Darhan Qydyrálige, kitapty aýdaryp, basqan ujymǵa el atynan alǵys aıtamyn», dedi.
Oqyrman nazaryna usynylǵan kitapta álemniń jetekshi elderiniń geoekonomıkalyq múddeleri turǵysynan Kaspıı-Qara teńiz basseıni men Ońtústik Kavkazda júrgizilip otyrǵan geosaıasat, Ázerbaıjan Respýblıkasynyń qazirgi jáne bolashaqtaǵy ekonomıkalyq damý máseleleri qarastyrylyp, ulttyq múddelerdi qamtamasyz etýdegi memlekettik saıasat negizderi ashyp kórsetiledi. Kitaptyń alǵysózin Akademııa basshysy D.Qydyráli jazǵan.
Baǵashar TURSYNBAIULY,
«Egemen Qazaqstan»
