Iаǵnı adamı kapıtal sapasyn jaqsartýmen qanattas bilim berý júıesine jaýapkershilik júkteıdi. Bul óz kezeginde elimizdiń joǵary oqý oryndaryndaǵy professor-oqytýshylar quramyna jańa jobalar jasaqtaý qajettiligin kórsetti. Q.Jubanov atyndaǵy Aqtóbe óńirlik memlekettik ýnıversıtetiniń Qarjy jáne nesıe kafedrasynyń dosenti, ekonomıka ǵylymdarynyń kandıdaty Jumagúl Maqasheva osy baǵytta eńbek etip kele jatqan ǵalymdardyń biri. Joldaý jarııalanǵannan beri oqytýdyń jańa jobasy men modelin jasaqtaǵan aqtóbelik jas ǵalymnyń basty maqsaty – qarjy júıesi boıynsha mamandyq alatyn stýdentterdiń irgeli bilimine eleýli ózgeris engizý.
Iаǵnı Jumagúl Jamansaryqyzy oqytý barysynda qarjyger-teorııashylardy emes, qarjyger-tájirıbeshi mamandaryn ázirleýge basymdyq beredi. Bul joba oqytýdyń ońtaıly modeline arqa súıeıdi. Ol otandyq qarjy naryǵy sýbektileriniń tájirıbelerin paıdalanýdy kózdeı otyryp, shákirtterge qarjy ınstıtýttarynyń tereń ıirimderin túsindirýdi murat tutady. Stýdentterdiń óndiristik tájirıbesi men dıplom jumysy bolashaqta bilikti maman bolýdyń basty kilti. Sondyqtan Jumagúl stýdentterdiń ǵylymı izdenisterine jetekshi bolýdan ózine kúsh-qýat alatynyn aıtady.
Qazir kóptegen joǵary jáne arnaýly oqý oryndarynda bolashaq qarjyger mamandar biryńǵaı teorııalyq ilimdermen qarýlanǵanymen, ony tájirıbelik turǵydan iske asyra almaı jatady. Osy olqylyqtyń ornyn tolyqtyrý úshin teorııa men tájirıbeni bir arnaǵa toǵystyrýǵa arnalǵan arnaıy ǵylymı-ádistemelik tujyrymdamalyq júıe jasaqtaldy, deıdi ol. Avtorlyq jobaǵa sáıkes, Aqtóbe qalasyndaǵy qarjy ınstıtýttaryna jyl saıyn ekskýrsııalar jasaý qarastyrylǵan. Ǵylymı-zertteý jumystarynyń naqtylyǵy men ómirsheńdigine kóńil bólinýi, kásipkerler men qarjy mamandarynyń qatysýymen dárister, pikirtalastar men iskerlik oıyndar ótkizilýi – jobanyń basty erekshelikteriniń biri.
Ol ýnıversıtet qabyrǵasynda baǵaly qaǵazdarmen jumys isteý daǵdylaryn meńgerýi úshin stýdentterdiń arnaýly saýda alańdarynda ótetin baǵaly qaǵazdardy satyp alý jáne satý isine únemi qatysýyn qadaǵalap otyrady. «Qarjy almanahy» úsh satyly baǵdarlamasy da teorııa men praktıkalyq máselelerdiń tutastyǵy men birligin, depozıttik esepter ashýdyń máni men mańyzyn, bankilik operasııalardyń adamǵa jáne memleketke tıgizer paıdasyn qarastyrady.
«Búginde joǵary kýrsta oqıtyn stýdentterimniń depozıttik jınaq qarajattary da, depozıttik operasııalarmen jumys isteý tájirıbeleri de bar», deıdi Jumagúl Maqasheva. Aıtýynsha, joǵary kýrs stýdentteriniń 57 paıyzy qazaqstandyq qor bırjasyna ótse, 33 paıyzy baǵaly qaǵazdar jónindegi arnaýly jobalardyń ıeleri atanypty. Al 10 paıyzy Nıý-Iork qor bırjasynyń tutynýshylary. Basym bóliginiń tapqan paıdasy qazirdiń ózinde 30 paıyzdy qurap úlgerdi. Sondaı-aq stýdentter taǵy da aksııalar satyp alyp, ilkimdilik tanyta bastaǵan. Osy arqyly odan dáris alatyn bolashaq qarjygerler qor naryǵyna turaqty túrde monıtorıng jasaýdy kúndelikti daǵdyǵa aınaldyryp otyr. Qarjylyq saýattylyq degen de osy emes pe?!
Temir QUSAIYN,
«Egemen Qazaqstan»
AQTО́BE
