Bir márte Nursultan Ábishuly Astanadaǵy meshitte Aýzashar berdi. Protokol boıynsha men Elbasynyń qasyna jaıǵastym. Quran oqylyp el asqa otyrǵanda Nursultan aǵa maǵan qarap: «Jaqsylyq, qalaısyńdar? Aýyl-aımaq aman-esen be?» dedi. «Jaqsy, aǵa» dedim. «Bıyl Almaty oblysynyń qyzylshasy qalaı bolady, júgeriniń jaıy she...» Almaty oblystyq máslıhatynyń depýtaty emespin be, oblystyń eńbekkerlerimen barlyq jıyn-basqosýda qoıan-qoltyq birgemin, egis dalasynda birge júremin. Bar jaıdy baıandap, «Bıyl ónim erekshe bolmaq, tátti túbir de jaman emes, júgeri de kúshti ósti», dedim. «Tipti Taldyqorǵanǵa kelseńiz kóresiz, qalany tanymaı qalasyz, ákim de bir sát qarap otyrmaıdy», dedim. Men oıymdy árdaıym ashyq aıtatyn janmyn. О́tirikke joqpyn. «Oı, sen aýylyńdy tym maqtap jibergen joqsyń ba ózi?» dep kúlimsiregen Prezıdent, «Eki aıdan soń baramyn, kóremin», dedi. Rasynda da eki aıdan soń Elbasy ýádesinde turyp, Taldyqorǵanǵa at basyn tiredi. Prezıdent qalany aralap bolǵan soń egis dalasyna keldi. Qyzylsha degen mynandaı, júgeri degen jaıqalyp ósip tur. Alla taǵalanyń bergeni de. Bir ýaqytta qatar kele jatqanymyzda Nursultan Ábishuly «Jaqsylyq, durys aıtypsyń. Senderden basqalar úlgi alsyn», dedi. Tóbem kókke eki eli jetpeı qaldy. Sharýa adamy ekenimdi sonda shyn sezindim. Oblys ákimi Amandyq Batalovtyń tynymsyz eńbegi, halyqtyń aýyzbirlikpen atqarǵan is-áreketiniń shynaıy kórinisi ǵoı bul. Elbasy Jetisýdan rıza bolyp attandy. Talpynǵan el, áıteýir, bir tabysqa, jeńiske jetedi, sportta da solaı ǵoı...
Ras, eńbektegen baladan eńkeıgen kárige deıin meniń eń aldymen ataqty sportshy ekenimdi biledi. Keńestik Olımpıada chempıony bolsam da Táýelsiz elde ataq-dańqym artty. Men ony qalaı umytamyn!? Qazir she... Malym bar, jaıym bar, bir kún qarap otyra almaımyn. Tańerteń Taldyqorǵanda bolsam, tús aýa Baqanastaǵy fermalarǵa jol tartamyn. Jaı tańdamaımyn, kúı tańdamaımyn. Qajet bolsa baqtashymen daladaǵy lashyqta jata ketemin. Biz bárimiz teńbiz. Múddemiz bir. Ol elimizdiń – dáýletti bolashaǵy.
Jaqsylyq ÚShKEMPIROV,
Qazaqstannyń Eńbek Eri,
grek-rım kúresinen
Olımpıada jáne álem chempıony
ALMATY
