«Jol qozǵalysynyń qaýipsizdigi QR Ishki ister mınıstrliginiń árdaıym baqylaýynda. Sońǵy jyldary júrgizilgen saraptamalarǵa súıensek, respýblıkada 2014 jyldan beri jol apaty jaǵdaıy azaıǵanyn baıqaýǵa bolady. Bıylǵy jyldyń 11 aıynyń qorytyndysy boıynsha jol apattary 5 paıyzǵa, qaıtys bolǵandardyń sany 14 paıyzǵa, jaraqat alǵandardyń sany 4,4 paıyzǵa azaıdy», - deıdi Álibek Keńispaev.
QR IIM ókiliniń aıtýynsha, jol apattary jaǵdaıynyń tómendeýi jergilikti jáne respýblıkalyq mańyzy bar joldarda da baıqalyp otyr.
«Jalpy, bul kórsetkishterge qolǵa alynǵan keshendi sharalardyń sep bolǵanyn kórip otyrmyz. Joldardyń boıynda baqylaý kúsheıtilip, «Qaýipsiz jol», «Avtokólik», «Avtobýs» atty aldyn ala sharalar júrgizildi. Bıylǵy jyly ǵana mas kúıde kólik júrgizgen 28 myń adam júrgizýshi kýáliginen aıyryldy. Buǵan qosa jol erejesin buzǵany úshin 8,5 myń adam júrgizýshi kýáliginen aıyrylyp, 3,2 myń adam ákimshilik qamaqqa alyndy», - deıdi Álibek Keńispaev.
