Búgingi sharanyń basty maqsaty - memleket usynyp otyrǵan baǵdarlamalar aıasynda jastardy eńbekke yntalandyrý jáne olardy jumysqa baýlý, sonymen qatar eńbekshi jastardy qoǵamǵa tanytý arqyly olardyń eńbegin baǵalaý bolyp otyr.
Búginde respýblıka turǵyndarynyń 4,5 mıllıonnan astam jastar bolsa, onyń ishinde 18 paıyzy nemese 800 myńǵa jýyǵy Ońtústik Qazaqstan jastary.
Sondyqtan da jergilikti bılik, óńir jastaryn qoǵamdyq jumysqa tartyp, turaqty jumyspen qamtý baǵytynda júıeli jumystar atqaryp keledi.
Búgingi forýmǵa memlekettik baǵdarlamalardy tıimdi paıdalanǵan 300-ge jýyq jas, olardyń ishinde «Dıplommen aýylǵa», «Jasyl el», «Jas saqshy», «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan» baǵdarlamasy men «Ár aýyldyń óz sheberi» jobalaryna qatysýshy jastar men kásiporyndardaǵy jas mamandar, eriktiler, oblystyq jastar uıymdary qatysty.
Forým jumysyna arnaıy qatysqan oblys ákimi Janseıit Túımebaev jas mamandardyń ınnovasııalyq jobalary men IT-tehnologııasyna arnalǵan quraldar kórmesin tamashalap, eńbekshi jastarmen tildesti.
«Jastar - elimizdiń bolashaǵy. El erteńi – jastardyń qolynda. Sizder ózderińizdiń aýqymdy jumystaryńyzben, qarqyndy qımyldaryńyzben elimizdiń ósip-órkendeýine, gúldenýine úlken úles qosyp júrgen jas býynsyzdar. Búginde sizder qoǵamdaǵy qozǵaýshy kúshke aınaldyńyzdar. Olaı deıtinimiz elimizde jastar saıasatyna erekshe kóńil bólinýde. Árbir jańa urpaq ómirge ózimen birge jańa lep, jańa ahýaldy qosa ákeledi. Bul obektıvti qubylys»,-dedi ákim.
Sonymen qatar, aımaq basshysy belsendi jastar týraly sóz qozǵap, kásiporyn uıymdarynyń eńbek qatynastarynda alatyn orny men mańyzy týraly aıtty.
«Qysqa merzimdi kásiptik oqytý baǵdarlamasy boıynsha mamandyǵy joq azamattar men eńbek naryǵynyń suranysyna oraı 12 159 azamat mamandyq alsa, onyń ishinde «Ár aýylǵa óz sheberi» aksııasy aıasynda aýyldardaǵy birinshi kezektegi qajetti mamandar tizimi naqtylanyp, 15 mamandyq boıynsha 9253 azamatqa kásiptik bilim berildi, olardyń 5 150-i jastar. Ońtústik óńirindegi 306 óndiris oryndarynda 20 myńǵa jýyq jas ter tógýde. Mysaly úshin «Álem BT» shulyq zaýyty ujymynyń 90 paıyzǵa jýyǵy sizderdiń qatarlastaryńyzdan qurylǵan. Al «Kentaý transformator zaýyty» AQ, «QazTransOıl» AQ, «Qazaqtelekom» AQ, «Bal tekstıl» JShS, «Standart sement» JShS, «Hımfarm» AQ, «Atameken» korporasııasy» JShS 50 paıyzynan astamy jastar»,-dedi J.Túımebaev.
Forým barysynda óńir basshysy jınalǵan jastardy kirip kele jatqan Jańa jyl merekesimen quttyqtap, Ulttyq «Delfı» oıyndarynyń jeńimpazdary men «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasynyń» qysqa merzimdi oqytý kýrsynan ótken jastarǵa «Alǵys hattar» tabystady.
Jumysshy jastar shara sońynda respýblıkalyq jáne oblystyq estrada juldyzdarynyń ónerin tamashalady.
