Tóraǵa Qaýipsizdik Keńesiniń qyzmetine jalpy basshylyq etedi, BUU Hatshylyǵynyń kómegimen Qaýipsizdik Keńesiniń kúndelikti úzdiksiz jumysyn qamtamasyz etedi. Tóraǵalyqtyń mindetterine Qaýipsizdik Keńesi músheleriniń kelisimi boıynsha Keńestiń atynan, sondaı-aq beıresmı konsýltasııalar barysyndaǵy talqylaýlardyń qorytyndylary boıynsha jáne Qaýipsizdik Keńesi árdaıym qandaı da bir qujattyń mátini boıynsha kelisimge qol jetkizgen kezde baspasóz aldynda málimdemeler jasaý kiredi.
2 qańtarda BUU Qaýipsizdik Keńesine múshe elderdiń turaqty ókilderi qańtar aıynda tóraǵalyqtyń baǵdarlamasyn qarastyryp, qabyldaıdy dep kútilýde. Sonymen qatar Qaýipsizdik Keńesi músheleri bolyp tabylmaıtyn BUU-ǵa múshe elder, baspasóz ben Úkimettik emes uıymdar úshin Keńes jumysynyń baǵdarlamasy týraly brıfıngter ótkiziledi. Qazaqstannyń bastamasymen Keńestiń turaqty emes músheleri retinde eki jyldyq merzimge saılanǵanyna baılanysty Qaýipsizdik Keńesinde alǵash ret Kot-d'Ivýar, Kýveıt, Nıderland, Perý, Polsha jáne Ekvatorıaldy Gvıneıa elderiniń baıraqtaryn resmı túrde ornatý rásimi ótedi.
18 qańtarda Prezıdent Nursultan Nazarbaevtyń tóraǵalyǵymen BUU QK músheleriniń «Jappaı qyryp-joıý qarýyn taratpaý: senimdi nyǵaıtý sharalary» taqyrybynda joǵary deńgeıdegi taqyryptyq pikirtalastary ótedi.
19 qańtarda «Qaýipsizdik pen damýdyń ózara táýeldilik úlgisi retinde Aýǵanstan men Ortalyq Azııadaǵy óńirlik áriptestikti qurý» taqyrybynda BUU QK-niń mınıstrlik pikirtalasy ótedi. Ortalyq Azııa men Aýǵanstan elderiniń Syrtqy ister mınıstrleri, sondaı-aq BUU Qaýipsizdik Keńesine múshe elderi syrtqy saıası vedomstvolarynyń basshylary qatysady dep kútilýde.
25 qańtarda BUU Qaýipsizdik Keńesinde BUU-ǵa múshe memleketterdiń Turaqty ókilderi deńgeıinde «Taıaý Shyǵystaǵy jaǵdaı, sonyń ishinde Palestına máselesi» taqyrybynda toqsan saıynǵy ashyq pikirtalastary ótedi.
Sonymen qatar dástúrli túrde qańtar aıynda Qazaqstan tóraǵalyǵynyń aıasynda Keńeste Sırııa, Lıbııa, Kongo Demokratııalyq Respýblıkasy, Ortalyq Afrıka Respýblıkasy, Darfýr, Batys Afrıka jáne Sahel, Ońtústik Sýdan, Malı, Somalı, Kıpr jáne Kolýmbııa elderindegi jaǵdaı boıynsha ashyq jáne jabyq pikirtalastary ótedi. Tóraǵanyń birqatar qararlary men málimdemeleriniń qabyldanýy josparlanýda.
2017-2018 jj. BUU Qaýipsizdik Keńesiniń múshesi retindegi Qazaqstannyń basymdyqtary Prezıdent N.Nazarbaevtyń BUU Qaýipsizdik Keńesine arnalǵan «Qaýipsiz, ádil jáne gúldengen álem qurý úshin jahandyq áriptestikti nyǵaıtýǵa qazaqstandyq tujyrymdamalyq kózqaras» atty saıası joldaýynda kórsetilgen. Olar jeteý: I) ıadrolyq qarýsyz álemdi jaqyndatý; II) jahandyq soǵys qaterin boldyrmaý jáne jergilikti janjaldardy retteý; III) óńirlik qaýipsizdik pen yntymaqtastyqty nyǵaıtýda Ortalyq Azııanyń múddelerin ilgeriletý; IV) terrorızmge qarsy kúres; V) Afrıkadaǵy beıbitshilik pen qaýipsizdik máseleleri;VI) qaýipsizdik pen ornyqty damýdyń arasyndaǵy ajyramas baılanystardy qamtamasyz etý; VII) Qaýipsizdik Keńesi men búkil BUU júıesin XXI ǵasyrdyń qaýip-qaterlerine beıimdeý.
BUU Qaýipsizdik Keńesinde tóraǵalyq etý joǵary halyqaralyq mártebe bolyp tabylady, sebebi Qaýipsizdik Keńesi májbúrleý sharalaryna, ekonomıkalyq sanksııalarǵa nemese ujymdyq áskerı áreketterge qatysty sheshimder qabyldaı alady. BUU-nyń Jarǵysyna sáıkes Qaýipsizdik Keńesi beıbitshilik pen halyqaralyq qaýipsizdikti qamtamasyz etý úshin basty jaýapkershilikti ózine júkteıdi jáne BUU-nyń barlyq músheleri onyń sheshimderine baǵynýǵa mindetti.
