Mine, sonyń bir aıqyn kórinisi elimizdiń Tórtinshi ónerkásiptik revolıýsııa jaǵdaıynda damý bıigine kóterilýi boldy. Ony Prezıdent Nursultan Nazarbaev halqyna arnaǵan kezekti Joldaýynda jarııa etip, Tórtinshi ónerkásiptik revolıýsııa jaǵdaıyndaǵy damýdyń jańa múmkindikterin saralap berdi. Bul eldiń múddesi men zaman talabynan týyndaıtyn, urpaqtyń bolashaǵy úshin júzege asýy tıis keleli mindetter. Onyń ıgiligin halyq kóredi. El damıdy. Demek, Qazaqstannyń damýdyń jańa kezeńine aıaq basqandyǵy endi aıqyn ańǵarylyp otyr. Munyń negizi osy ýaqytqa deıingi baıypty da baısaldy júrgizilgen tıimdi reformalardyń nátıjesi.
Al eldi órkendeýdiń, halyqtyń turmysyn jaqsartýdyń jolyn Elbasy táýelsizdiktiń alǵashqy jyldarynda-aq aıqyndap berdi. Áýeli ekonomıka, sosyn saıasat joly adastyrmady. Sonyń arqasynda Qazaqstan álemdegi túrli synaqtarǵa tótep berip, qarqyndy ekonomıkalyq órleý jolyna tústi. Barlyq salada oń ózgerister bolyp, halyqtyń ahýaly jaqsardy. Qol jetken jetistikterdi odan ári jalǵastyra berý úshin qazirgi kúni elimizdiń 2050 jylǵa deıingi uzaq merzimdi Damý strategııasy júzege asyrylýda. 100 naqty qadam – Ult jospary aıasynda, joǵaryda aıtqanymyzdaı, jańa keń aýqymdy reformalar qolǵa alyndy. Sonyń aıasynda konstıtýsııalyq reforma júzege asty. Rýhanı jańǵyrý baǵyty boıynsha keshendi is-sharalar júzege asyrylýda. Munyń bári birlik pen izgiliktiń jemisi.
Endi jańa Joldaý aıasynda ekonomıkamyzdy odan ári órkendetý úshin Tórtinshi ónerkásiptik úderister iske asyrylýy qajet. Alaıda Elbasy «Jemqorlyqpen kúres jáne zańnyń ústemdigi» atty toǵyzynshy mindette atap ótkendeı, qaı salada bolmasyn zańnyń ústemdigi oryn almaı birde-bir is naqty sheshimin tappaıdy. Sondyqtan elimizde zań talaptaryn saqtaý, ala jipten attamaý jolynda qolynda bıligi bar adamdardyń adal jumys isteýi áý bastan-aq erekshe nazarǵa alyndy. «Jemqorlyqtyń aldyn alýǵa baǵyttalǵan kúres jalǵasa beredi. Kóp jumys istelip jatyr. Sońǵy 3 jylda ǵana joǵary laýazymdy sheneýnikter men memlekettik kompanııalardyń basshylaryn qosa alǵanda, jemqorlyq úshin 2,5 myńnan astam adam sottaldy. Osy ýaqyt ishinde olardyń 17 mıllıard teńge kóleminde keltirgen zalaly óteldi», dedi Prezıdent.
Jemqorlyq joq elde kez kelgen jumys jaqsy júredi. Sonyń biri retinde, Memleket basshysy eldi sıfrlandyrý úderisi kezinde barlyq salada joǵary damýǵa qol jetetinin aıtty. «Memlekettik organdardaǵy prosesterdi, sonyń ishinde olardyń halyqpen jáne bıznespen qarym-qatynasyn sıfrlandyrý mańyzdy bolyp sanalady. Atap aıtqanda, azamattar óz ótinishteriniń qalaı qarastyrylyp jatqanyn kórip, der kezinde sapaly jaýap alýǵa tıis» dedi. Bul tártiptiń, zań talaptarynyń oryndalýy arqasynda qyzmet kórsetý sapasy artatynyn bildiredi. Sondyqtan da qazirgi kúni sot jáne quqyq qorǵaý júıelerin ınstıtýttyq turǵydan ózgertý júzege asyrylýda. Zańnamaǵa qylmystyq prosestegi azamattardyń quqyqtaryn qorǵaý isin kúsheıtýdi, onyń ásire qatańdyǵyn báseńdetýdi kózdeıtin normalar engizildi.
Odan ári Prezıdent quqyq qorǵaý organdarynyń ókilettigi men jaýapkershilik shegi aıqyndalǵanyna nazar aýdarady. Bul oraıda kóptegen ıgilikti ister tyndyrylǵanyn jurtshylyq jaqsy biledi. Eń bastysy, qylmystyq saıasatty izgilendirý úderisi jolǵa qoıyldy. Biraq munymen shektelip, toqmeıilsip qalýǵa bolmaıdy. Zamanǵa qaraı zańdardyń da, zań ústemdigin ornatý joly da damyp otyrýy qajet. Sondyqtan Elbasy «Azamattardyń konstıtýsııalyq quqyqtaryna kepildikti nyǵaıtý, quqyq ústemdigin qamtamasyz etý, quqyq qorǵaý qyzmetin izgilendirý jumystaryn jalǵastyrý qajet», dedi. Mine, baıqasańyz, halqymyzdyń irgetasy qalanǵan rýhanı da, materıaldyq ta qundylyqtarynyń altyn qabyrǵasyn odan ári kedergisiz qalaý Tórtinshi ónerkásiptik revolıýsııanyń negizi retinde zań ústemdigin tolyqtaı ornatý arqyly júzege asyryla bermek.
Aleksandr TASBOLAT,
«Egemen Qazaqstan»
