Ishki ister mınıstri Qalmuhanbet Qasymov jetekshilik etken áskerı keńeske Prezıdent kómekshisi – Qaýipsizdik keńesiniń tóraǵasy Vladımır Jumaqanov, Bas áskerı prokýror Erǵalı Merzadınov, óńirlik qolbasshylyqtardyń qolbasshylary, áskerı bólim komandırleri, Áskerı ınstıtýt bastyǵy men olardyń tárbıe jáne áleýmettik-quqyqtyq jumystar jónindegi orynbasarlary qatysty.
Basqosýda negizgi baıandamany Ulttyq ulan Bas qolbasshysy Rýslan Jaqsylyqov jasady. Ol óz sózinde ótken jyldyń qyzmettik-jaýyngerlik áreketterdi qorytyndylap, alda aıqyndalǵan jospar-jobalardy júzege asyrýda ulandyqtar ózderine júktelgen mindetterdi tolyqtaı oryndaıtynyn tilge tıek etti.
Sonymen qatar, R.Jaqsylyqov elimizdiń qoǵamdyq qaýipsizdigi men qorǵanysyn tıimdi qamtamasyz etý boıynsha áskerdi qazirgi jáne aldaǵy mindetterge sáıkestendirý bolyp tabylatyn Ulttyq ulannyń 2017-2019 jyldarǵa arnalǵan Damý baǵdarlamasynyń oryndalý barysymen tanystyrdy. Onda negizgi basymdyq taktıkalyq qımyldar, kásibı-laýazymdyq daıarlyq pen basqarý organdaryn jetildirýge basa mán berilgen. Osy oraıda bıylǵy 2018 jyl Ulttyq ulanda kásibı daıarlyq jyly bolyp bekitilgenin málimdedi.
Al óz kezeginde sóz alǵan Ishki ister mınıstri quqyq qorǵaý organdary men Ulttyq ulan jaýyngerleriniń elimizdegi qoǵamdyq tártipti qamtamasyz etýdegi orny men jeke quramnyń eljandylyq rýhyndaǵy tárbıesine jete kóńil bólý kerektigin aıtty.
Otyrysta sonymen birge Prezıdent kómekshisi – Qaýipsizdik keńesiniń tóraǵasy V.Jumaqanov, Bas áskerı prokýror E.Merzadınov sóz sóılep, ulandyq áskerdiń tynyshtyqty saqtaýdaǵy qyzmetiniń mańyzdylyǵyn atap ótti. Sondaı-aq, jıynda óńirlik qolbasshylyqtar qolbasshylarynyń esebi tyndaldy.
Áskerı keńestiń otyrysyn qorytyndylaǵan Ishki ister mınıstri Q.Qasymov barlyq deńgeıdegi komandırler men bastyqtardy áskerdiń jaýyngerlik daıarlyǵyna, áskerı tártip pen quqyqtyń saqtalýyna nazar aýdaryp, aldaǵy mindetterdi aıqyndady.
