Al endi Elbasynyń sońǵy Joldaýy Qazaqstan halqyn jańa zamanǵa jedel beıimdele otyryp, álemdegi Tórtinshi óndiristik revolıýsııa kóshinen qalmaýǵa úndeıdi. Bul jerde taǵy bir atap ótpeýge bolmaıtyn nárse N.Nazarbaev bul Joldaýda jahandyq jańǵyrý jolynda adam kapıtalyna erekshe kóńil bóldi. Iаǵnı izgilikke shaqyryp, ıgilikke jaraıtyn bilim berý arqyly adam áleýetin paıdalanýdy basymdyqqa alý qajettigin aıtty.
Bizdiń memleketimizde osy maqsattaǵy jumystar áldeqashan bastalyp ketkeni belgili. Máselen, mektepke deıingi bilim berý baǵdarlamasy aıasynda 2019 jyldyń 1 qyrkúıeginde balalardy áleýmettik beıimdeý men ózin-ózi damytýǵa erte daıyndaý baǵytyndaǵy birińǵaı baǵdarlamalyq júıe qoldanysqa engiziledi dep josparlanýda. Al 2021 jylǵa qaraı orta bilim berýdiń jańartylǵan mazmundyq júıesine kóshirý isi óz máresine jetedi.
Sonyń aıasynda joǵary bilim berý júıesi men ondaǵy pedagogıkalyq kafedra, fakýltetter de zaman talabyna saı jetildirilmek. Osynyń bárin júzege asyrý barysynda negizgi basymdyq retinde jaratylystaný men matematıka ǵylymy syndy salalardy oqytý mazmunynyń sapasyn joǵarylatý kózdelgen. Mundaı múmkindikter bizdiń qoǵamnyń sońǵy jyldardaǵy túrli salalardyń tehnologııalyq shapshań damýyna jedel beıimdelýi úshin óte mańyzdy bolmaq.
Sondaı-aq zamanǵa saı jańǵyrýǵa jeteleıtin bul Joldaýda búgingi búldirshinderimizdi úsh tilde oqytý jaıy da kezekti ret málimdelgen. Onyń ústine Elbasymyz keleshekte árbir otandasymyz qazaq, orys, aǵylshyn tilin erkin meńgerýine meılinshe jaǵdaı jasaýymyz qajettigin aıryqsha atap ótti. Oǵan qosa memlekettik tildi damytý isin qaperden shyǵaryp almaý kerektigine de kóńil bóldi. Bul rette san ǵasyrlyq damý tarıhy bar qazaq tilin zamanaýı talapqa saı etip jetildirip, termınologııalyq mańyzyn halyqaralyq qarym-qatynas tili deńgeıine kóterýimiz kerek ekendigin aıtty. Al latyn grafıkasyna kóshý osy maqsattaǵy jumysymyzdyń biri bolmaq.
Osyndaı máselelerdi arqaý etken bıylǵy Joldaýda aıtylǵan máseleler ret-retimen sheshimin taýyp júzege assa, Qazaqstan keleshegi kemeldene túsedi dep nyq senimmen aıta alamyz.
Ábýbákir VOINSE,
Qazaqstan dúngenderi qaýymdastyǵynyń tóraǵasy, QHA múshesi
ALMATY
