Roman Krech jastaıynan jarq etip kóringen sportshylardyń qatarynan. 2008 jyly jasóspirimder arasyndaǵy álem chempıonatyna barǵan jas jigittiń qımyly, kórsetken nátıjesi kóptegen bapkerlerdiń qoıyn dápterine túrtilgen-di. Iá, bilikti bapkerler qatelespepti. 2009 jyly jasóspirimder arasyndaǵy Álem birinshiliginde Semeı qalasynyń týmasy Roman 1000 metr qashyqtyqta úshinshi oryn aldy. Araǵa eki kún salyp ol 1500 metr qashyqtyqta kúmis júldeger atandy. Osydan keıin bapkerler ony jastar quramasyna aýystyryp, jasy úlkendermen básekelesýge saldy. Degenmen jas jigit eresekter arasynda da adasyp qalmaı, nátıjesin kún sanap arttyra berdi. Onyń dáleli 2009 jylǵy Álem kýbogy bolatyn. Alǵash Álem kýbogyna qatysqan Krech táp-táýir nátıje kórsetip, álemdik shoq juldyzdarmen synǵa tústi.
Halyqaralyq jarystardyń dámin sezip qalǵan Roman 2010 jyly Olımpııa oıyndaryna lısenzııa jeńip aldy. Vankýverdegi aq oıyndarda Krech sensasııa jasap ketýi múmkin delindi. Qurama komandamyzdyń bapkerleri senim artty. Alaıda jas jigitke aldyńǵy lektegi jelaıaqtarmen aıqasýǵa áli erte eken. Ol 500 metr qashyqtyqta 34-shi, al 1000 metr qashyqtyqtaǵy synda 28-shi keldi. Árıne Vankýver Olımpıadasy Roman úshin alǵashqy iri synaq bolatyn. Túbi bolashaǵy bar sportshy kelesi Olımpıadada atoı salar dep kúttik.
2014 jylǵy qysqy oıyndar kórshiles Reseı jerinde ótti. Sochıdiń muz aıdynynda medaldyń syńǵyryn estip qalarmyz dep úmittendik. Konkımen júgirýshilerdiń kórinetin kezi kelgendeı edi. Basty úmitimiz – sol baıaǵy Roman Krech. Sebebi Álem kýbogynyń kezeńderi men álem birinshilikterinde jerlesimiz jelpinip júrdi. Júlde almasa da, myqtylarmen terezesi teń taıtalasty. Odan bólek Azııa oıyndarynda ol aldyna jan salmaı, naǵyz babyna kelgenin kórsetti. 2014 jyldyń basty jarysyna Krech eshqandaı jaraqatsyz, jaqsy kóńil kúımen attandy. Alaıda ol ózi unatatyn 500 metr qashyqtyqta 7-oryn alyp qaldy. Júldegerler qataryna kirý úshin oǵan 1 sekýnd jetispedi. Konkımen júgirý sportynda árbir sekýnd úlken mańyzǵa ıe. Al 1000 metr qashyqtyqta ol 13-satyǵa taban tiredi.
Endi araǵa taǵy tórt jyl salyp Roman Krech óziniń úshinshi Olımpııalyq oıynyna qatyspaqshy. Bul joly qalaı bolar eken? 28 jastaǵy sportshyny jasy keldi dep tizimnen syzyp tastaǵysy kelgender de joq emes. Sebebi sportshy osydan eki jyl buryn jaraqat alyp, jattyǵý jasaı almaı qalǵan kezder de boldy. Endi ol barlyǵyn umytyp, osy Olımpıadada sońǵy múmkindigin paıdalanyp kóredi. Bar kúshin salyp, ómiriniń basty jarysyna tyńǵylyqty daıyndalýda. Onyń daıyndyǵy tipti ótken jyldyń basynan beri bastalyp ketken. Krech Kanadanyń Kalgarı qalasynda óziniń jeke rekordyn tirkedi. 500 metr qashyqtyqty Roman 34,21 sekýndta júgirip ótti.
Qazir, Qazaqstannyń konkımen júgirýshiler quramasy Germanııanyń Erfýrt qalasynda oqý-jattyǵý jumystaryn júrgizip jatyr. Osyǵan deıin olar Kıpr aralynda bolyp, daıyndyqtaryn pysyqtady. Phenchhandaǵy oıyndarda Roman 500 jáne 1000 metr qashyqtyqtarda baq synaıdy. Bálkim, osy joly Romannyń joly bolar?
Ermuhamed MÁÝLEN,
«Egemen Qazaqstan»
