Búgingi tańda bul mektepte sporttyń 13 túri boıynsha 438 jasóspirim 7-11 synyptarda bilim alyp ári sporttyq sheberlikterin shyńdaýda. Olardy 25 joǵary bilikti maman jattyqtyrady. Muǵalimderdiń 70 paıyzdan astamy joǵary kategorııaly. Mekteptiń arnaıy sporttyq bazasy, dárigerlik ortalyǵy jáne oqý korpýsy bar.
Munda bilim alyp jatqan shákirtterdiń kóbi az qamtylǵan otbasylardan shyqqandar. Olardyń deni mektepti bitirgennen keıin joǵary oqý oryndaryna túsip, ózderiniń bilimderi men sporttyq biliktilikterin shyńdaı almaıdy. Sporttyq kareralaryn orta joldan aıaqtap, mektepti bitirgen deńgeıde qalady. Sóıtip keıbir talantty jastardyń kásibı sporttaǵy bolashaǵy buldyr bolyp otyr.
Onyń ústine mektepti bitirgen jastardyń bizde oqýǵa túse almaǵan soń Reseıge ketý tendensııasy artyp jatyr. Máselen, 2015 jyly – 7, 2016 jyly 8 túlegimiz Reseıge kóship ketken. Osynyń ózi bizge ekonomıkalyq turǵydan da soqqy bolyp tııýde, óıtkeni memleket árbir oqýshynyń shyǵynyna bir jylǵa 1 mln 500 myń teńge tóleıdi, al 7 synyptan 11 synypqa deıingi bes jylda árqaısyna kem degende 7 mln 500 myń teńge shyǵyn shyǵady eken. Endi sol balalarymyz ózge eldiń týynyń astynda qyzmet etýge májbúr.
Osyǵan baılanysty oblystyq sporttyq mektep-ınternatty olımpıadalyq rezervtiń oblystyq sporttyq kolledjine aınaldyrý kerek degen usynys engizip otyrmyz. Sonda biz:
– sporttyq rezervtiń úzilmeıtin júıesin daıyndar edik;
– jasóspirimder sportynyń úlken sporttyq jetistikterge bastaıtyn joǵary býynmen jalǵasýyn qamtamasyz eter edik;
– oblys sportshylarynyń Ulttyq qurama komandalardyń qataryna ótýi artar edi;
– kolledjdi bitirgennen keıin árbir túlekke «Jattyqtyrýshy-oqytýshy» mamandyǵy beriletin bolǵandyqtan, elimizdegi jattyqtyrýshylar qataryn kóbeıtip, olardyń mektepterdegi dene tárbıesiniń oqytýshylary, BJSM-ǵa (balalar men jasóspirimderdiń sporttyq mektebi), aýyldyq, aýdandyq mektepterge, fıtnes ortalyqtarǵa, óndiristik kásiporyndarǵa nusqaýshy, jattyqtyrýshy bolyp ornalasýyn qamtamasyz eter edik.
Qaraǵandy oblysynyń Dene tárbıesi jáne sport basqarmasynyń 2017 jylǵy málimetine qaraǵanda, tek osy oblysta ǵana 9 aýdan 76 sport mamanyna zárý bolyp otyr. Mundaı jaǵdaılar basqa oblystarda da bar ekeni sózsiz. Biz aıtyp otyrǵan kolledj ashylsa, osy zárýlikti joıýǵa bolar edi.
Sport kolledjderiniń ashylýy Prezıdenttiń 2018 jylǵy Joldaýynyń talaptaryna da saı keledi. Elbasy qajet etkenniń bárine aqysyz kásibı-tehnıkalyq bilim berýimiz kerek dep talap qoıǵany belgili.
Mine, osy máselelerdi aıta otyryp, men Mádenıet jáne sport mınıstri Arystanbek Muhamedıulyna depýtattyq saýal joldadym. Saýaldy qoldap Májilis depýtaty, Olımpıada chempıony O.Shıshıgına da qol qoıdy. Mınıstr bizdiń usynysymyzǵa qoldaý kórsetedi degen úmittemiz.
Serik SÁPIEV,
Májilis depýtaty,
Olımpıada chempıony
