Jınaqtyń tusaýkeseri jaqyn kúnderi Londonda ótpek. «Qazaqparat» agenttigi habarlaǵandaı, Halyqaralyq Qazaq PEN-klýbynyń prezıdenti, belgili pýblısıst Bıgeldi Ǵabdýllınniń bastamasymen sońǵy birneshe jylda «Biz – qazaqpyz...» atty joba bastalyp, joba aıasynda qazaq klassıkteriniń týyndylaryn AQSh pen Ulybrıtanııada aǵylshyn tilinde shyǵarý jumysy qolǵa alynǵan.
«Osy ýaqytqa deıin Qazaq PEN-klýby demeýshilerdiń kómegimen aǵylshyn tiline Muqaǵalı Maqataevtyń «Tańdamaly óleńderi», Berdibek Soqpaqbaevtyń «Meniń atym Qoja», Oljas Súleımenovtiń «Kod slova», Ábish Kekilbaevtyń «Ańyzdyń aqyry», Gerold Belger men Smaǵul Elýbaıdyń kitaptaryn joǵaryda atalǵan elderde basyp shyǵarǵan. Jýyqta Almatydaǵy «Idan» baspasy qazaqtyń birtýar qalamgeri Oralhan Bókeıdiń «Kisi kıik» kitabyn («The man-dear and other stories») aǵylshyn tiline aýdaryp basyp shyǵardy. Týyndyny belgili aǵylshyn aýdarmashysy Saımon Hollıngsvort aýdardy», deıdi Bıgeldi Ǵabdýllın.
1000 danamen jaryq kórgen atalmysh kitapqa jazýshynyń birqatar povesteri men áńgimeleri kirip otyr. PEN-klýb aldaǵy ýaqytta da qazaq qalamgerleriniń kitaptaryn aǵylshyn tiline aýdarýdy jalǵastyra bermek.
Mıras ASAN,
«Egemen Qazaqstan»
