Alaıda halyqqa nátıjeli qyzmet isteý úshin qolyna bılik berilgen sheneýnikter osy mindetterin oryndamasa, biri keıin tartyp, biri buǵyp, biri jantalasa qazynanyń qarjysyn jep jatsa memleket isi aqsaıdy. Odan kimge paıda? Árıne, sybaılasqan baı-manaptardyń murty qısaıa qoımas, biraq qarapaıym halyq zııan shegedi. Sóıtip bılikke degen senim tómendeıdi. Sapasyz atqarylǵan jumystyń jaqsylyqqa aparmaıtynyn Prezıdent únemi eskertip keledi. Máselen, Memleket basshysynyń tóraǵalyǵymen ótken Úkimettiń keńeıtilgen otyrysynda Elbasy «QazAvtoJol» ulttyq kompanııasynyń jumysyn synǵa aldy. О́tirik, kóz aldaý aqyry orǵa jyqty. Sapaly jol salýǵa dep bólingen qarjynyń jartysyn qaltaǵa basqan basshylar memleketke orasan zııan tıgizdi. Onyń zardabyn taǵy da halyq tartady. «Árıne, bul jaqsylyqtyń nyshany emes. Osynyń ózi qarjyny tıimdi ıgerý jáne jol sapasy boıynsha úlken kemshilikterdiń bar ekenin kórsetip otyr», dedi Elbasy. Sonda, bul salaǵa jaýapty adamdar qaıda qaraǵan?
Árıne, urylardyń ustalǵany jón. Mundaı urylardyń talaıy ustalyp, qamalyp, sottalyp jatyr. Odan memlekettiń qarjysyn urlaý tıylyp otyr ma? Joq. Halyqqa keregi bireýlerdiń sottalǵany emes, halyqqa keregi ózderine qajetti jumystyń sapaly oryndalǵany. Biraq báribir, «myna úı salýǵa, jol salýǵa, mal ósirýge, t.b. mádenı salalardy damytýǵa bólingen memleket qarjysyn jymqyryp qoısam sottalamyn-aý» dep aıaǵyn tartatyn sheneýnikter kórinbeıdi. «Jemqorlyqpen kúresti jalǵastyrý kerek. Eki jylda 2200 laýazymdy tulǵa qylmystyq jaýapkershilikke tartyldy. Olardyń ishinde mınıstrler, búkil deńgeıdegi ákimder, vedomstvo basshylary bar», dedi Prezıdent. Bul sońǵy eki jylda ǵana qylmysqa tartylǵan sheneýnikter. Al irisi bar, ortashasy bar, ýaǵy bar degendeı, memlekettik salalardaǵy isti bolyp jatqan barlyq sheneýnikterdi shetinen terip jipke tizer bolsaq ne bolady? Oǵan áli jep jatqan, biraq ázirge ustalmaı murty maılanyp, buǵyp júrgenderdi qosar bolsaq she? Sanaýǵa san jetpeı qalar dep qorqamyz. Olardyń eldiń órkendeýine, adal adamdardyń turmysyna tıgizip jatqan zııany qanshama! Mıllıardtap jep jatyr ǵoı. Buǵan qashan toqtam bolmaq? «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýynda Elbasy: «Sońǵy 3 jylda ǵana joǵary laýazymdy sheneýnikter men memlekettik kompanııalardyń basshylaryn qosa alǵanda, jemqorlyq úshin 2,5 myńnan astam adam sottaldy. Osy ýaqyt ishinde olardyń 17 mıllıard teńge kóleminde keltirgen zalaly óteldi», dedi. Az qarjy emes. Alaıda osy qarjy ýaqytyly óz mindetine jaratylǵanda elge naqty paıda keletin edi ǵoı. Kútken nátıje bolmaı qaldy, sóıtip osyndaı keleńsizdik kesirinen ekonomıkamyz da belin jaza alar emes.
Rasy kerek, búginde azǵantaı sharýa atqarylsa sony jalaýlatyp jınalys ótkizýge qumar basshylar kóp. Ýsaq-túıek isti qampaıtyp, jar salady. Onysy halyqqa paıdasy az, nátıjesi shamaly dúnıe bolyp shyǵady. Elbasy «Biryńǵaı satyp alýshynyń modelin engizý men óńirlik elektr jelilik kompanııalardy irilendirý josparlanýda. Energetıka mınıstri bul sharalar jaqsy nátıje beretinin, tutynýshy úshin elektr energııasy qunyn tómendetetinin baıandaǵan bolatyn. Alaıda buǵan qol jetken joq», dedi. Iá, halyqqa keregi nátıje. Mınıstrliktiń jumysty tolyqqandy atqara almaı jatqany halyqtyń kinási emes, tutynýshyǵa elektr energııasynyń úzdiksiz tıimdi baǵada jetkizilýi qajet. Endeshe osy aıtylǵandardy ár sala basshylary jiti qaperge alyp, óz mindetterin árqashan adal oryndar bolsa, memleket isi únemi halyqtyń kóńilinen shyǵyp, qoldaý taba beretini anyq.
Aleksandr TASBOLAT,
«Egemen Qazaqstan»
