1-taım
Oıyn bastalmaı turyp negizgi quram oıynshylaryna kóz júgirtkenimizde shabýyl ótinde Djýnıor Kabananganyń joqtyǵy birden baıqaldy. Onyń ornyna Djordje Despotovıch shyǵypty. Bas bapker Stanımır Stoılov birden amalsyz surmergenniń ornyna qolda bar shabýylshyny qoıypty. Qalǵanynyń barlyǵy tegis burynǵy ózderiniń ornyna jaıǵasypty. Tek jaraqatynan aıyǵyp kelgen Laslo Klıaınhaısler alańǵa qaıta oralypty. «Sportıng» sapynda da shabýylshymen azdy-kem másele ornaǵan. Osyǵan deıin jaraqat alyp qalǵan Bast Dosttyń ornynan Reseı chempıonatynda aty shyqqan Seıdý Dýmbııany baıqadyq.
Alǵashqy mınýttarda dop ustaýdan qatelesip, pastary dál jetpegen «Sportıng» oıynshylary ortalyq alańda baıqaýsyzda doptan aıyrylyp qaldy. Osy sátte shabýyl ótine oıysyp ketken Marın Tomasov áriptesten tamasha pas alyp, joıqyn soqqymen esep ashty. Birikken Arab Áıirlikterinde ótken joldastyq matchtarda erekshelengen Marın shynymen de dál qazir óz babyn tapqanyn dáleldedi. «Spartak» pen «Krasnodar» qaqpalaryna gol soqqan horvatııalyq jartylaı qorǵaýshy komandaǵa endi úırenisken sekildi.
Portýgalııalyq komanda bolsa jasandy alańda ózderiniń úırenshikti oıynyn kórsetý qıyn ekenin baıqap, áýelegen pastarǵa kóńil bóldi. Únemi dopty tóbemen asyryp berip, boıshań oıynshylaryna senim artty. Sonyń saldary bolsa kerek, qaqpamyzǵa qaraı buryshtama doptary qarsha borady. Biraq, olardyń eshqaısysy da qaqpaǵa darı qoımady.
2-taım
2-taım bastalysymen «Sportıng» shabýylǵa lap qoıdy. Shamasy bapker Jorje Jezýsh shákirtterine qatty-qatty sóılese kerek, qonaqtar birden belsendilik tanytty. Aınaldyrǵan on mınýttyń ishinde portýgalııalyqtar qatarynan 3 gol soǵyp, elordalyqtardy sabasyna túsirdi. 48 ben 55-mınýttar aralyǵynda Brýno Fernandes (penaltıden), Jelson Martınsh, Seıdý Dýmbııa úsheýi qazaqstandyq ujymǵa óte aýyr úsh soqqy berdi. 7-mınýttyń ishinde jerlesterimiz jer sıpap qaldy. 1:0 esebimen utyp turyp, aıaq asty kelgen goldardan eseńgirep qaldy. Fýtbolshylar túgil trbýnadaǵy jankúıerdiń salysy sýǵa ketti. Basy tátti bolǵanymen, aıaǵy osylaısha qatty bolady dep kim oılaǵan. Tipti, fanattar sektorynan ekinshi goldy talap etip, «Sportıngtiń» silekpesin shyǵarýdy tilegender de az emes edi. О́z alańynda kóp jeńile bermeıtin klýbymyz mundaı aýyr hálge túsedi dep árıne kóbisi oılaı qoıǵan joq. Degenmen, deńgeıdiń aty deńgeı. «Iýventýspen» teń túsip júrgen Chempıondar lıgasynyń komandasy Eýrpa lıgasyna kelgende avtomatty túrde týrnırdiń favorıtine aınalmaı ma? Quramynda osydan eki jyl buryn Eýropa chempıony bolǵan fýtbolshylar júrse, qalǵandary óz memleketteriniń ulttyq quramalarynda oınaıtyn sen tur men ataıyndar bolsa, ne shara, ne daýa. Onyń ústine «Astana» qorǵaýshysy Iýrıı Logvınenko eki sary qaǵaz alyp, alańnan qýyldy. 10 adammen Portýgalııanyń ataqty komandasyna qaıbir ses kórsetesiz.
Tynǵan oıyn tyndy. Syrt alańdaǵy matchtan da úmit az. Biraq, bul tek «Astanaǵa» ǵana emes, barsha qazaqstandyq klýbtarǵa sabaq bolýy kerek. «Sportıng» sekildi baı tarıhyń bolmasa da, óz akademııańdy quryp, jastaryńdy tárbıelep sodan nár alatyn deńgeıge jetý. Únemi, syrttan kelgen legıonerdiń aıaǵyna qarap otyra berý óziń otyrǵan aǵashtyń butaǵyn keskenimen teń. Krıstıaný Ronaldý, Nanı sekildi fýtbolshylardy syılaǵan «Sportıng» akademııasy búkil klýbqa tabys túsirip, qanshama portýgal balalaryna úlken sportqa esig ashyp otyr. Dińgegi myqty komandanyń deńgeıi de bizden joǵary bolatyn sodan da shyǵar.
Ermuhamed MÁÝLEN
