«Mınıstrlik jergilikti atqarýshy organdarmen birge kóktemgi sý tasqyny qaterin azaıtý úshin keshendi sharalar atqardy. Qazgıdromettiń boljamdy málimetteri boıynsha, jalpy elimizde qar kólemi normadan tómen. Degenmen, sý tasqyny qaýpi jerdiń kóktemgi ylǵaldaný deńgeıiniń joǵary bolýymen kúrdelenip otyr. Qazirgi ýaqytta jer tońynyń qalyńdyǵy 60 santımetrden 1,5 metrge deıin jetedi. Bul ótken jylǵy kórsetkishten birshama joǵary. Biraq, qardyń jınalýy da jalǵasyp jatyr», - dedi mınıstr.
Onyń dereginshe, eń kúrdeli jaǵdaı muzdyń erip, Syrdarııa ózeni sýynyń deńgeıiniń artýyna baılanysty Ońtústik Qazaqstan men Qyzylorda oblystarynda bolýy yqımal. Sondaı-aq Aqmola, Qaraǵandy, Qostanaı jáne Soltústik Qazaqstan oblystarynda da sý tasqynyń oryn alý qaýpi bar.
«Kóktemgi sý tasqyny kezinde jaǵdaıdyń aldyn alý maqsatynda arnaıy toptar quryldy. 49 myńnan astam adamnan turatyn bólimder jasaqtaldy. 16800 tehnıka bar. Sý tasqyny bolǵan jaǵdaıda halyqty qaýipsiz jerge kóshirýge arnalǵan beketter anyqtalyp, baǵdarlary belgilengen. Qajetti kólik quraldarymen de qamtamasyz etilgen. Ulttyq gvardııa men Ishki ister mınıstrliginiń áskerı jasaqtary da daıyn», - dedi Qalmuhanbet Qasymov.
Mınıstrdiń dereginshe, jergilikti atqarýshy organdar eldi mekenderden 3,5 mln tonna tekshe metr qar shyǵarǵan. 8,5 myń tonna janarmaı, 125 myń tonna qajetti materıaldar bar. Ákimdikter tótenshe jaǵdaılar bolǵan jaǵdaıǵa 24,7 mlrd teńge daıyndap otyr.
