Astana qalasy ákiminiń birinshi orynbasary Sergeı Horoshýn «Nurly jer» baǵdarlamasy boıynsha úlestik qurylystyń máselesin sheshý jónindegi ákimniń tapsyrmasyn jáne qala turǵyndarynyń qaýipsizdigi men jaılylyǵyn qamtamasyz etý úshin jyly aıaldama ornatýdyń josparyn daıyndaý jóninde baıandady.
«О́tken aptada VAK otyrysynda 17 nysan qaraldy. Problemaly bolyp tanylǵan «Svetlyı» turǵyn úı kesheni paıdalanýǵa berilip, 143 otbasy pátermen qamtamasyz etildi, osyǵan oraı problemaly nysandar sany 52-ge deıin qysqardy. «Elorda qurylys kompanııasy» ókiletti mekemesimen sot boıynsha TQK-ne ótkizilgen nysannyń tehnıkalyq aýdıti men qarjylaı júzege asyrý týraly kelissózder júrgizilip jatyr», – dedi S.Horoshýn.
Ákim osy oraıda «Nurly jer» baǵdarlamasyn barynsha ashyq júrgizip, barlyq kelip túsken qajetti aqparatty resmı resýrstarǵa jarııalaýdy tapsyrdy.
Áset Isekeshev qaladaǵy aýdan ákimderine avtobýs aıaldamasy boıynsha bilim, densaýlyq saqtaý jáne áleýmettik qorqaý basqarmalarymen birlesip, jyly aıaldama qurýdyń josparyn kelisý kerektigin aıtty.
«Eń aldymen jyly aıaldamalar múmkindigi shekteýli jandar men balalarǵa qolaıly, ıaǵnı mektep, aýrýhana, basqa da áleýmettik nysandarǵa jaqyn bolý kerek. Osy jyly qajetti degen barlyq jerlerge 200 aıaldamany kúz-qys aıy jaqyndaǵansha ornatyp úlgerýimiz tıis», – dedi ákim.
Sondaı-aq, osy 200 aıaldamanyń tizimin Astana ákimdiginiń resmı saıtynda jarııalap, qala turǵyndarymen birigip talqylaý kerektigin de qulaqqaǵys etti.
Tótenshe jaǵdaı, sanıtarlyq-epıdemıologııalyq, qalanyń qazirgi tynys-tirshiligin, jylý maýsymy jaıyn qala ákiminiń orynbasary Qosman Aıtmuhametov baıandady. Aıtýynsha, ótken aptada juqpaly aýrýlar boıynsha sanıtarlyq-epıdemıologııalyq ahýal turaqty, baqylaý deńgeıinen aspaǵan. Jylý da shtattyq rejımde ótýde. Energııa kózderi normatıvti otyn qorymen qamtylǵan.
Memlekettik-jekemenshik áriptestik jobasyn iske asyrý, Smart-sıtı, naryqtaǵy janar-jaǵarmaı materıaldary men kómir, «Sergek» beınebaqylaý kamerasyn iske qosý týraly qala ákiminiń orynbasary Malıka Bekturova aıtyp shyqty. Ol naryqta kómir men janar-jaǵarmaıǵa turaqty monıtorıng júrgizilip, kún saıyn baqylaýda ekenin aıtty.
Astanadaǵy quqyqtyq tártipti qamtamasyz etý sharalary men krımınaldyq ahýal barysynda qalalyq IID basshysy Marat Qojaev esep berdi.
«Jalpy, astanada operatıvti ahýal turaqty. О́tken aptada 616 qylmys tirkeldi. Bul ótken jylmen salystyrǵanda 326 oqıǵaǵa azaıdy. Izi sýymaı 90 qylmys ashyldy, onyń 54-i buryn jasalǵan, byltyr – 36. 33 narkoqylmys anyqtaldy, onyń 8-i aýyr qylmys. Izdeýde júrgen 5 qylmysker qolǵa tústi, iz-túzsiz joǵalǵan 6 adam tabyldy.
Sońǵy kezderi áleýmettik jelige qatysty ınternet-alaıaqtar da paıda boldy. Osyǵan baılanysty, halyq arasynda jáne restoran ákimshisi men ıelerine túsindirý jumystary júrgizilip, arnaıy jadynamalar taratyldy», – dedi M.Qojaev.
Qoǵamdyq transporttyń jumysyn «Astana LRT» JShS basqarma tóraǵasy Bekmyrza Igenberdınov baıandap berdi.
Áset Isekeshev halyqtyń qoǵamdyq transporttyń tehnıkalyq jaǵdaıy men jumysyna qatysty áli de alańdaýshylyq bildiretinin aıta kele, «AstraBus» mobıldi qosymshasy arqyly atalǵan máselelerdi ITS kómegimen sheshý qajettigin aıtty. Kásibı júrgizýshilerdi de daıyndaý jumystaryn kúsheıtýdi tapsyrdy.
Esterińizge sala keteıik, Astana ákimi Áset Isekeshev 2018 jyly jaıaý júrginshiler jolyna qatysty máseleni sheshýdi tapsyrǵan bolatyn. Iаǵnı barlyq magıstraldi joldardaǵy jaıaý júrginshiler jolyn alyp tastap, baǵdarsham ornatýdy, «jasyl tolqyn» dep atalatyn biriktirilgen kedergisiz ótýdi qamtamasyz etý, sondaı-aq jaryqtandyrýdyń qatar júrýin tabys etken. Kishigirim kóshelerdegi jaıaý júrginshiler jolyn qaldyryp, olardy jaryqtandyrý kerektigin aıtty. Bul aıtylǵan máseleniń bári osy 2018 jyly sheshilýi tıis.
Qalany abattandyrý máselesi boıynsha Almaty, Esil, Saryarqa aýdany basshylarynyń baıandamalary tyńdaldy.
