«Rýhanı jańǵyrý» baǵdarlamasy aıasynda qolǵa alynǵan «Uly dala jastary» atty joba sheńberinde uıymdastyrylǵan baıqaýda qatysýshylar jasyl ekonomıka, ınnovasııalyq serpilis, bolashaq energııasy, áleýmettik kásipkerlik jáne úzdik týrıstik ónim taqyryptarynda óz jobalaryn qorǵady.
«Mundaı baıqaý alǵash ret ótkizilip otyrsa da oqýshylar men stýdentterdiń qyzyǵýshylyǵy zor ekenin ańǵardyq. HHI ǵasyr - jańa tehnologııalar dáýiri. Osyndaı jahandyq ózgerister kezeńinde bilim jáne bıznes birinshi orynda bolýy qajet. Bizdiń ýnıversıtettiń qabyrǵasynda uıymdastyrylǵan aımaqtyq saıystyń maqsaty – jastardy kásipkerlikke baýlý, olardyń qoǵamdaǵy ornyn aıqyndaýǵa úles qosý», - deıdi ýnıversıtettiń «Bıznes» kafedrasynyń oqytýshysy, ekonomıka ǵylymdarynyń magıstry Áıgerim Oralbekqyzy.
Bir kúnge sozylǵan baıqaý qorytyndysynda qazylar alqasyna «Shyny saýyttaǵy raýshan gúli» jobasyn usynǵan «Istok» jeke menshik jalpy bilim berý mektebiniń 11-synyp oqýshysy Dmıtrıı Podoınıkov I dárejeli dıplommen marapattalyp, «Bıznes» kafedrasynyń mamandyqtary boıynsha 15 paıyz jeńildikpen bilim alý múmkindigine ıe boldy. «Polıgonǵa týrıstik ekskýrsııalar» jobasyn qorǵaǵan Kýrchatov qalasyndaǵy №3 orta mektebiniń 10- synyp oqýshysy Ekaterına Lokshtanovaǵa II dárejeli dıplom men «Bıznes» kafedrasynyń mamandyqtary boıynsha 10 paıyz jeńildikpen bilim alýǵa múmkindik beretin sertıfıkat tapsyryldy. Rymbek Baıseıitov atyndaǵy Semeı qarjy-ekonomıkalyq kolledjiniń 2 kýrs stýdentteri Gúlaıym Myrzabekova, Gúlmıra Sovetova, Altyngúl Toqaeva úshinshi dárejeli dıplommen marapattalyp, tıisinshe 5 paıyz jeńildikpen oqý sertıfıkatyn ıelendi.
Azamat QASYM,
«Egemen Qazaqstan»
О́SKEMEN
