1-taım
О́tken oıynmen salystyrǵanda «Astana» men «Sportıng» ekeýi de birneshe fýtbolshylardy aýystyrypty. Elordalyq klýb sapynda bul joly ortalyq qorǵaýshy qyzmetinde Evgenıı Postnıkov boldy. Astanadaǵy oıynda Iýrıı Logvınenko qyzyl qaǵaz alyp ketkeni esterińizde shyǵar. Al qalǵan oıynshylar so kúıi óz oryndaryna jaıǵasqan. «Sportıng» bapkeri Jorje Jezýshta birneshe ózgeris engizipti. Apta burynǵy oıynda qorǵaýshylarymyzdyń, ásirese Shomkonyń zyǵyrdanyn qaınatqan Jelson Martınsh bul joly múlde tizimge ilinbedi. Ortalyq shabýylshy rólinde Seıdý Dýmbııa emes, jaraqatynan aıyqqan Bas Dost shyqty. Nıderlandııa quramasynyń gabýylshysy shyǵa salysymen jyldam gol soǵyp, salymyzdy sýǵa ketirdi. Odan bólek Jeremı Mate men Stefan Rıstovskııler de negizgi quramnan oryn alypty. Bul Portýgal komandasynyń alǵashqy oıynnan keıingi nátıjege arqa súıegendigi dep túsindik. Árıne, birinshi oıyndaǵy esep ekinshi kezdesýge de lebin sezdirip turdy. «Joze Alvaladedegi» oıynnyń alǵashqy mınýttarynda Marın Tomasovtyń belsendiligi erek kórindi. Sol qaptal arqyly qaıta-qaıta julqyp ótip, aıyp alańyna túrli-túrli pastar berýmen aınalysty.
Birinshi taım aıaqtalar tusta Djordje Despotovıch dopty qaqpa baǵanyna dál teýip, Djýnıor Kabananganyń joqtyǵyn sezdirtip qoıdy. Alaıda sol shabýyldyń sońy túbi soǵylǵan golǵa alyp keldi. Marın Tomasov áýelegen dopty toqtatpastan Rýı Patrısıý qaqpasyna súńgitip jiberdi. Esep 1:1.
2-taım
Ekinshi taım basynda Rýben Rıbeırýdyń ornyna Markos Akýnıa shyqty. Shamasy bas bapker Jezýsh shabýyl ótindegi oıynǵa kóńili tolmasa kerek. Sonyń nátıjesinde Brýno Fernandes alystan aıanbaı teýip alań ıelerin alǵa shyǵardy. Odan keıin dál sol Fernandes qaqpashymen betpe-bet shyǵyp, match esebin Astanadaǵydaı etti. Biraq, bul esep uzaq saqtala qoıǵan joq. Sol baıaǵy belendi Marın Tomasov aıyp alańyna kirip soqqy baǵyttap, ol qorǵaýshynyń birine tıip Patrık Tvýmasıdiń aıaǵyna jata qaldy. Oıyn boıy kózge túspegen Patrık esep aıyrmasyn qysqartty. Al tóreshi qosqan 3 mınýtta eki buryshtama berip úlgerdik. Sonyń ekinshisinde Dmıtrıı Shomko alystan joıqyn soqqy jasap, tarazy basyn teńestirdi.
«Joze Alvalade» stadıony elordalyq komandanyń ónerine dán rıza bolysyp, dostyqtyń jalaýyn kóterdi. Degenmen, jankúıerler men jergilikti fýtbol mamandarynyń kóńil-kúıleri sonshalyqty máz emes ekenin baıqadyq. Álbette, "Sportıng" sekildi myqty uym qalaısha "Astanamen" óz alańynda teń túsedi? Olar úshin bul qıyn jaǵdaı. Alańdaýǵa turarlyq jaıt.
Ermuhamed MÁÝLEN
