Sýret: gov.kz
Kanada tarapy data-centric (derekterge baǵdarlaný) modeli boıynsha damyp, úsh negizgi vertıkalǵa bólingen óziniń sıfrlyq ekojúıesiniń qurylymyn usyndy, olar – ósimdik sharýashylyǵy, mal sharýashylyǵy jáne tutyný taýarlary. Kompanııanyń baǵdarlamalyq jasaqtamasy men jasandy ıntellektige negizdelgen sheshimderi búginde álemniń 60 elinde shamamen 101 mln gektar egistik alqabyn qamtıdy jáne agronomdar men álemdegi eń iri azyq-túlik brendterine tehnologııalyq qoldaý kórsetedi.
Kelissózder barysynda Serik Jumanǵarın otandyq AО́K aldynda dástúrli ekstensıvti ádisterden zamanaýı qarqyndy tehnologııaǵa kóshýdiń strategııalyq mindeti turǵanyn atap ótti.
«Búginde ishki naryqta jáne irgeles memleketterdiń naryǵynda et pen mal sharýashylyǵy ónimine suranys qarqyndy ósip otyr. Bul jaǵdaıda biz óndiris kólemi men tıimdiligin sapaly túrde arttyrýymyz kerek. Bizdiń mıssııamyz – Qazaqstanǵa jetekshi halyqaralyq tehnologııalyq chempıondardy tartý jáne olardyń tájirıbesin tikeleı óndiriste toǵystyrý», dedi S.Jumanǵarın.
Kanadalyq ınvestorlar Aqmola oblysy men Kanadanyń Alberta provınsııasynyń klımattyq jaǵdaıynyń uqsastyǵyn atap ótip, bul synaqtan ótken sıfrlyq hattamalardy tıimdi túrde beıimdeýge múmkindik beretinine nazar aýdardy. TELUS Agriculture basshylyǵy Aqmola oblysynda topyraqtyń qunarlylyǵyn baqylaý, ósimdikterdi qorǵaý jáne daqyldardy dál irikteý úshin JI jáne mamandandyrylǵan baǵdarlamalyq qanatqaqty jobany iske qosýǵa daıyn ekendigin bildirdi.
Kezdesý qorytyndysy boıynsha taraptar Aýyl sharýashylyǵy mınıstrligimen birlesip Aqmola oblysyndaǵy qanatqaqty jobany egjeı-tegjeıli pysyqtaý týraly ýaǵdalasty.
