Oǵan qatysýǵa bıyl 23 áıel ynta bildirdi. Avtosherýdiń sharty boıynsha áıelder kóligin túrlishe bezendirdi. Osy jarysta bas júldeni alǵan Ekaterına Kojevına óziniń temir tulparyna kóılek pen shlıapa «kıgizip», sylanǵan sulýdyń keıpin kórsetti. Al Memlekettik qyzmet isteri jáne sybaılas jemqorlyqqa qarsy is-qımyl departamentiniń qyzmetkeri Ǵalııa Qasymova ózi mingen «Lada prıorasyn» ulttyq oıýlarmen jáne ulttyq kıim kıgen qýyrshaqpen bezendiripti.
– Eń basty maqsatymyz, áıelderdiń yntymaǵyn kórsetý, jol erejesin saqtaýdy nasıhattaý jáne kópshilikke merekelik kóńil-kúı syılaý boldy, – deıdi Jastar resýrsy ortalyǵynyń dırektory Aıgúl Abdýllına.
Áıelder júrgizgen temir tulparlar sherýi qala ortasyndaǵy Jeńis saıabaǵynan ortalyq Abaı dańǵyly arqyly qalanyń bir shetindegi «Astyqjan» saýda ortalyǵyna deıin júrip ótti. Sherýdi kórgen qalalyqtardy mashınalardyń bezendirilýi erekshe qyzyqtyrdy. Olar úshin kólikterdi áıelderdiń tizgindeýi de búgin erekshe jarasym tapqandaı boldy. Rýldegi áıelderdiń barlyǵynyń da kólik júrgizýde keminde úsh jyl ótili bar.
– Rýlge arýlar otyrǵan avtosherýdiń taǵy bir maqsaty, «áıel mashına júrgize almaıdy» degen qalyptasyp qalǵan túsinikti joqqa shyǵarý edi. Qaıta eń uqypty jáne jol erejesin qatań saqtaıtyn júrgizýshilerdiń áıelder ekenin aıtqym keledi, – deıdi jergilikti polısııa bastyǵynyń orynbasary Álibek Bermuqanov. Sherý márege jetken soń, uıymdastyrýshylar júrgizýshiler úshin vıktorınalyq suraqtar qoıdy. Júrgizýshi arýlardyń barlyǵy da merekelik syılyqtarǵa ıe boldy.
Názıra JÁRIMBET,
«Egemen Qazaqstan»
QOSTANAI
