Prezıdent sóziniń kirispesinde halyqtyń birligi, memlekettiń syndarly saıasaty arqasynda qazaqstandyqtar búkil synnan súrinbeı ótkenine toqtaldy.
Elbasy Qazaqstannyń tórt oblysynda Qazaq halqyna alǵys monýmenti ashylǵanyn atap ótti. Atalǵan eskertkishterdiń bári qıyn-qystaý zamanda kómek qolyn sozǵan halyq pen jerge alǵys retinde Qazaqstandaǵy túrli etnostyq toptardyń tarapynan salyndy. Munyń bári qazaq halqynyń ulttyq tarıhyna tereń qurmetti kórsetedi. Bul ózara qurmet pen senim bizdiń halyqtyń biregeıligin qalyptastyrady. Osy bastama arqyly qazaqstandyqtardyń kóńiliniń keńdigi baıqalady.
Alǵys monýmenti alǵash ret barsha qonys aýdarylǵan etnostardyń rahmeti retinde 2012 jyly Qıyr Shyǵystan kúshtep kóshirilgen koreılerdiń alǵash toqtaǵan jeri Úshtóbe qalasyndaǵy Bastóbe shyńynda Qazaqstandaǵy koreılerdiń qaýymdastyǵy tarapynan ashyldy. Keıinirek Qazaqstandaǵy koreılerdiń qaýymdastyǵy bastamasymen mundaı monýmentter Oralda, Atyraýda boı kóterdi.
«Zamanaýı Qazaqstannyń ósip-órkendeýine árbir otandasymyz óz úlesin qosty. Men etno-mádenı birlestikterge de aıryqsha rızashylyq bildiremin. Biz, bárimiz birge óte kúrdeli, qıly zamandardan óttik. Táýelsizdiktiń eń taǵdyrsheshti sátterinde meni árdaıym qoldaǵan halqyma da alǵys aıtamyn. О́tken saılaýlardyń bárinde halqymyz meni biraýyzdan qoldap, saılady. Men úshin eń úlken marapat – osy. Elimniń qoldaýy maǵan jumys barysynda zor kúsh-jiger berdi», dep atap ótken bolatyn Prezıdent.
Jańa áleýmettik bastamalardy tanystyrý sátinde Memleket basshysy olardyń qoǵamdaǵy áleýmettik birlikti nyǵaıtýǵa, árbir qazaqstandyqtyń ál-aýqatyn jaqsartýǵa arnalǵanyn atap kórsetti.
Prezıdent kótergen bastamalardy talqylaı otyra, Qazaqstandaǵy koreıler qaýymdastyǵy músheleri onyń mańyzdylyǵy men ózektiligine toqtaldy. Aıtylǵan mindetter qazirgi tańdaǵy áleýmettik máselelerdi keshendi jáne pragmatıkalyq jolmen sheshýge, naqty tapsyrmalar júktep, naqty qadamdar jasaýǵa múmkindik beredi.
Sergeı OGAI,
Qazaqstandaǵy koreıler qaýymdastyǵynyń prezıdenti
