«Búgin biz jaqsy bir habar aldyq. Qytaı Halyq Respýblıkasynyń tóraǵasy Sı Szınpın Naýryz meıramyna baılanysty Qazaqstan Prezıdenti Nursultan Ábishuly Nazarbaevqa arnaıy quttyqtaý hatyn joldap, barsha qazaqstandyqtardy osy merekemen quttyqtady. Qazirgi kezde Qytaıda úlken eki jınalys boıynsha aýqymdy sharalar ótip jatyr. Soǵan qaramastan, Sı Szınpın myrza ýaqyt taýyp, Nursultan Ábishulyna arnaıy jedelhatyn joldady. Osynyń ózi eki basshy arasyndaǵy myqty dostyqtyń kórinisi bolsa kerek», - dedi QHR-dyń Qazaqstandaǵy Tótenshe jáne О́kiletti elshisi Chjan Hanhýeı búgin Naýryz meıramyna arnalǵan saltanatty sharada.
Elshiniń aıtýynsha, búginde eki el arasyndaǵy saýda-ekonomıkalyq baılanystar oıdaǵydaı damyp keledi. Kórshi memleket Qazaqstan ekonomıkasyna qyrýar qarjy salyp otyr. «Bir jol - bir beldeý» bastamasy aıasynda ózara yntymaqtastyq ta kúsheıip keledi.
«Kommýnıstik partııanyń jınalysynda Qytaıdyń ekonomıkalyq ósimi 6,5 prosent bolady degen maqsat qoıyldy. Halyqtyń tyǵyz ornalasqanyna qaramastan, bizde jan basyna shaqqanda ishki jalpy ónim 9 800 dollardy qurap otyr. Qytaı úshin bul - úlken jetistik. 2021 jylǵa deıin biz kedeıshilik máselesin tolyǵymen sheshýdi kózdeımiz. Úsh jyldan keıin 400 mıllıonnan astam adam kedeıshiliktiń qamytynan qutylady degen jospar bar. Osylaısha, 2021 jylǵa deıin Qytaı tolyǵymen orta toptyń deńgeıine shyǵýy tıis. Oǵan deıin kedeı otbasylar qalmaýy qajet», - dep atap kórsetti Ch.Hanhýeı.
