mangystau.gov.kz
Aqtaý qalasynda uıymdastyrylǵan óńirdiń basty merekelik is-sharasyna Mańǵystaý oblysyna arnaıy saparmen barǵan «Nur Otan» partııasy Tóraǵasynyń birinshi orynbasary Máýlen Áshimbaev qatysyp, Ulystyń uly kúnin jergilikti halyqpen birge qarsy aldy, dep habarlady partııanyń baspasóz qyzmeti.
Mańǵystaýlyqtardy jáne barsha Qazaqstan halqyn Naýryz meıramymen quttyqtaǵan partııa Tóraǵasynyń birinshi orynbasary halqymyz ejelden bul kúndi jańarý men jasarýdyń bastaýy, bereke men birliktiń arqaýy dep biletinin aıtty.
– Ata-babamyz áz-Naýryzdy qashanda eńsesi bıik eldiktiń, irgesi sógilmes birliktiń merekesi retinde atap ótip keledi. Halqymyzdy ortaq múddege, bereke-birlikke, yntymaqqa uıystyratyn bul meıram beıbitshilik pen kelisimniń qazaqstandyq úlgisiniń jarqyn kórinisi, – dedi Máýlen Áshimbaev.
Naýryzdyń bastaýy sanalatyn «Amal» merekesi dál osy ólkeden tamyr jaıatyny barshaǵa belgili. Onyń ústine áýlıeli meken Mańǵystaýdyń halqymyz úshin alar orny da erekshe. О́ńirde Beket ata, Shopan ata, Qaraman ata, Masat ata, Shaqpaq ata, Sultan úpi sııaqty jerasty meshitteri bar. Qoınaýyna ǵasyrlar syryn jasyrǵan Kenti baba qorymy da asyl muralarymyzdyń biri. TabıǵatAnanyń ózi tartý etken tylsymǵa toly Saýra saıy, Qaraqııa oıpaty, Tamshaly kóli jáne Sherqala men Otpan taý da kıeli mekenge kórik berip turǵan qundy jádigerlerimiz. Osy turǵydan kelgende Mańǵystaý oblysynyń ulttyq qundylyqtardy nasıhattaýda mańyzy zor.
– Ata-babalarymyzdyń ejelden kele jatqan salt-dástúrin dáriptep, ulttyq qundylyqtarymyzdy nasıhattaýda mańǵystaýlyqtardyń róli erekshe. Elbasy aıtqan ulttyq kodty saqtaýda «kórisý kúni» sııaqty merekelerdiń de mańyzy zor, – dedi partııa Tóraǵasynyń birinshi orynbasary.
Mańǵystaýǵa sapary barysynda M.Áshimbaev sondaı-aq partııanyń oblystyq aktıvimen kezdesip, osy óńirdegi nurotandyqtarmen Prezıdenttiń bes áleýmettik bastamasyn keńinen talqylady.
Jalpy Mańǵystaý qashanda tyń bastamalarymen erekshelengen óńir. Bıyl da Elbasymyzdyń bes áleýmettik bastamasyn júzege asyrý maqsatynda qarqyndy jumystar júrgizýde. Bul jóninde oblys ákimi Eraly Toǵjanov: «Elbasynyń bes áleýmettik bastamasynyń biri ár qazaqstandyq otbasynyń baspanaly bolýyn kózdeıdi. О́tken jyldyń ózinde oblysymyzda 7 myń otbasy baspanamen qamtyldy. Bıyl jańa baǵdarlama arqyly bul kórsetkish eselene túsetini anyq. Osy maqsatta biz naýryzdyń alǵashqy kúni oblysymyzda «Asar – Jomart júrek» aksııasyn jarııaladyq. Aksııa barysynda 25 mln teńge kóleminde qarajat jınalyp, 3500 otbasyna kómek kórsetildi», – dedi.
Máýlen Áshimbaev pen Eraly Toǵjanov atalǵan aksııanyń shapaǵatyn kórip, baspanaly bolǵan kóp balaly ana, «Kúmis alqa» ıegeri, II toptaǵy múgedek Monshaq Jolmaǵambetovanyń shańyraǵyna arnaıy baryp, merekemen quttyqtady.
