Elbasynyń maqalasynda kórsetilgen basty baǵyttar boıynsha sharalar atqarylyp, túrli jobalar boıynsha bir jyl boıyna atqarylǵan jumystardyń qorytyndylary jarııalanǵan. QSZI jýrnaldarynyń aǵymdaǵy jylǵy birinshi sandary óz oqyrmandaryn rýhty jáne jaýapkershiligi joǵary birtutas ultty qalyptastyrýǵa yqpal etetin qoǵamdyq sanany jańǵyrtýdyń mańyzdy baǵyttarymen tanystyrady.
«Kazahstan-Spektr» jýrnalynyń bas redaktory Mádına Nurǵalıqyzy jýrnaldyń osy sıpattaǵy sanyn jasaý ıdeıasy ótken jyldyń sońynda paıda bolǵanyn aıtty. «Jalpy jýrnal nómiri tolyǵymen Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyna arnalǵan. Áleýmettik saýaldamalar júrgizip, sarapshylarymyz bir jylǵy jumystyń ǵylymı-praktıkalyq qorytyndysyn jasady», dedi Mádına Nurǵalıqyzy. Bir jyl ýaqyt ótkende jobalardy iske asyrý tıimdiligi men deńgeıin, belgili bir nátıjelerin baǵalaý múmkin bolyp otyr. «Kazahstan-Spektr» jýrnalynda teorııalyq jáne ádistemelik maqalalarmen qatar jobalar týraly naqty málimetter, kópshilik jáne saraptamalyq saýaldamalar nátıjeleri bar.
Rýhanı jańǵyrý –jahandyq úrdis. Ártúrli memleketterde qoǵamdyq sanany jańǵyrtý ózindik erekshelikterdi eskere otyryp, belgili bir nysanda júzege asady. Maqalalarda álemdik tájirbıeniń, sondaı-aq Qazaqstandaǵy rýhanı jańǵyrý bastamalarynyń aýqymy men ereksheligi taldanǵan. Mysaly «Rýhanı jańǵyrý: tabysty qoǵamnyń áleýmettik ınjenerııasy» atty maqalada ulttyq mentalıtetti jańǵyrtý boıynsha Lı Kýan Iý bastamasymen júzege asqan «Sıngapýr keremeti», eýropalyq tájirbıe – úsh qarapaıym qaǵıda: «kúshti atqarýshy, «ulttyq ulylyq» pen áleýmettik-ekonomıkalyq saladaǵy «dırıjızm» ıdeıalaryna negizdelgen Sharl de Golldiń memlekettik qurylys úlgisi, Úndistandaǵy Mahatma Gandıdiń Satıagraha ıdeologııasy jáne basqa memlekettik ustanymdary talqylanǵan.
«Qoǵam jáne Dáýir» jýrnalynyń bas redaktory Alýa Joldybalına óz sózinde qoǵamdyq sanany jańǵyrtý jobasynyń ǵylymı-zertteý qyzmetiniń sheńberinde «Rýhanı jańǵyrý» jobasyn júzege asyrý barysyna toqtaldy. «100 jańa esim» jáne zamanaýı álemdegi qazaqstandyq mádenıet sekildi jobalarǵa qatysty maqalalarǵa sholý jasady. Mysaly «Qazaqstannyń bastamalary: adamı kapıtaldyń áleýmettik mádenı brendıngi» maqalasy «Qazaqstandaǵy 100 jańa esim» jobasynyń aıasynda memleket pen qoǵamnyń ózara senimdi baılanys ornatýy arqyly adamı kapıtaldy brendteý ádisterin zertteýge baǵyttalǵan. «Rýhanı jańǵyrý formatyndaǵy mádenıet» atty maqalada oqyrmandar Qazaqstannyń mádenı murasyn sıfrlandyrýdyń alǵashqy qorytyndylarymen tanysa alady. Sandyq ınnovasııalar engizý jáne mádenı muralarǵa turǵyndardyń qoljetimdiligin qamtasyz etý arqyly joǵary sapaly mádenı qundylyqtardy saqtaý jáne nasıhattaý elimiz úshin mańyzdy.
Jıynda sóz alǵan jýrnal avtorlary da «Bolashaqqa baǵdar: rýhanı jańǵyrý» baǵdarlamalyq maqalasy men jýrnaldardyń arnaıy basylymdary týraly pikirlerin ortaǵa salyp, rýhanı jańǵyrý kezeńinde ǵylymı paıymdar men tujyrymdardyń mańyzdylyǵyn atap ótti.
Baǵashar TURSYNBAIULY,
«Egemen Qazaqstan»
