Anglııanyń chempıony bolý áste ońaı sharýa emes. Alaıda ótken jyldan beri jeńimpaz komanda aldyn ala belgili bolatyn úrdis qalyptasty. 2017 jylǵy chempıonatty Antonıo Konte baptaıtyn «Chelsı» naýryz aıynyń sońyna qaraı jeńip alǵan edi. Kóp komandada múmkindik qalmaı, barlyǵy sol joly biraýyzdan «aqsúıekterdi» moıyndaǵan. Bul joly da sol ssenarıı qaıtalandy. «Manchester Sıtı» qaladaǵy «Manchester Iýnaıtedpen» básekelesti. Alaıda Joze Moýrıno eki kemeni qatar ustaımyn dep sýǵa ketti. Chempıondar lıgasyna kóńil bólip júrgende «Bornmýt», «Bernlı» sekildilerden utylyp, upaı joǵaltty. Keıinnen Chempıondar lıgasynda «Sevılıaǵa» jol berip, jarystan shyǵyp qaldy. Al ótken apta sońynda «qyzyl soıqandar» óz alańynda týrnırlik kesteniń túbindegi «Vest Bromvıchten» jeńilip, chempıondyqtan kúder úzdi. Iаǵnı eshqandaı múmkindik qalmady. Sóıtip Hosep Gvardıola baptaıtyn «Manchester Sıtı» London tórindegi «Ýemblıde» «Tottenhemdi» aıqyn jeńip, Anglııa chempıony atandy.
Bul Gvardıolanyń jetinshi jetistigi. Ol osyǵan deıin «Barselonamen» Ispan La-lıgasyn 3 ret, German Býndes-lıgasyn 3 márte utty. Endi ekinshi jyl qyzmetinde «Manchester Sıtımen» chempıon atanyp otyr. Bapkerler arasynda ol 3 memlekettiń chempıony atandy. Endi ıspan bapkeri taǵy bir memlekettiń klýbymen chempıon atanar bolsa, ataqty eki bapkerdiń rekordyna jetýi múmkin. Olar – Moýrıno men Karlo Anchelottı (ekeýi de
4 memlekettiń chempıony).
Sonymen qatar ótken apta sońynda bolǵan 33-týrda Fransııanyń da chempıony anyqtaldy. Uzaq ýaqyt kósh basshylyqty eshkimge bermegen PSJ negizgi qarsylasy «Monakony» 7:1 esebimen oısyrata utyp, Fransııa chempıony atandy. Ýnaı Emerı shákirtteri «Manchester Sıtı» sekildi 5 týr buryn jeńimpaz boldy. Jalpy alǵanda sońǵy jyldary Fransııada PSJ-ǵa teń keler eshkim joq. German Býndes-lıgasynda da uqsas jaǵdaı. «Shalke» komandasynan 20 upaı alǵa ozyp ketken «Bavarııa» chempıondyqty áldeqashan toılap tastaǵan. «Nemis máshınesiniń» qazirgi bar oıy – Chempıondar lıgasy.
Ispanııadaǵy jaǵdaı burynnan belgili. Munda da bir klýbtyń aıqyn basymdyǵy seziledi. «Barselona» «Real» (Madrıd) upaı joǵaltqan saıyn kóshbasshylyǵyn nyǵaıta berdi. Kúni keshe ǵana «Valensııany» jeńgen «Barselona» ekinshi oryndaǵy «Atletıkodan» 11 upaıǵa uzap ketti. «Barsanyń» chempıondyǵynan buryn, La-lıgada «Real» Madrıdtiń «Atletıkomen» ekinshi orynǵa talasy qyzyqty bolyp turǵan sekildi. Sebebi Erneste Valverde shákirtteri qalǵan 6 týrdyń 4-eýinde jeńiledi degenge qazir jas bala da senbeıdi. Úlken chempıonattardyń kóbisinde tartys taǵdyrlary sheshilip qoıǵan. Tek Italııanyń «A» serııasynda qazir báseke qyzyp tur. «Napolıden» 6 upaı ozǵan «Iýventýstyń» jaǵdaıy qıyndaý. Basymdyqty saqtap qalý úshin Massımılıano Allegrı jigitteri 22 sáýir kúni «Napolı» komandasymen kezdesedi. Odan keıin «Inter» jáne «Romamen» oınaýǵa májbúr. Sondyqtan da Italııa chempıony kim bolatynyn jaqyn arada bile qoımaımyz-aý. Eýropanyń alyp chempıonattarynyń ishindegi tartysqa toly jalǵyz chempıonat osy Italııa bolmaqshy.
Ermuhamed MÁÝLEN,
«Egemen Qazaqstan»
