О́tken jyldyń 15 jeltoqsanynda «QazMaqta» AQ-qa maqta shıkizatyn ótkizip, qarjysyn ala almaı júrgen bir top sharýa Maqtaaral aýdany ákimdigine aryzdanǵan bolatyn. Keıinnen ákimdik ókilderi korporasııanyń dırektoryna kóterilgen máseleni sheshý týraly hat joldaǵan. Alaıda «QazMaqta» basshylyǵy qarjy máselesi sheshilmeı jatqandyǵy jóninde aýyzsha habar berip, aqshany tólemegen-di. Osydan keıin sharýalar aǵymdaǵy jyldyń aqpanynda aýdandyq ishki ister basqarmasyna aryzdandy. Artynsha korporasııaǵa qatysty Qylmystyq kodekstiń 190-baby, 4-bóliminiń 2-tarmaǵy boıynsha is qozǵalyp, jedel tergeý sharalary júrgizildi.
Daýly máselege oblys ákimi Janseıit Túımebaev pen oblys prokýrory Nurǵalym Ábdirov aralasyp, jaǵdaıdy óz baqylaýyna alǵan. Osylaısha qolǵa alynǵan tıisti sharalardyń arqasynda 15 aqpanda sharýalardyń 60 mln teńgesi tólense, 21 naýryz kúni 150 mln teńge qarjy qaıtaryldy. Qalǵan 44 sharýanyń aqshasy 5 sáýir kúni tolyǵymen ótelipti. О́z kezeginde maqtaly óńirdiń sharýalary máseleniń sheshilýine tikeleı yqpal etken oblys ákimi men aımaq prokýroryna rızashylyqtaryn aıtýda.
Erkejan AITQAZY,
«Egemen Qazaqstan»
