Osylaısha Astanaǵa kórik beretin aq tal, úıeńki, qaıyń, qaraǵaı, emen, súmbil terek, sheten aǵashtary kóbeıe tústi. Aǵash kóshetterin egýde eń alda kele jatqan Esil aýdany deýge bolady. Aıta ketelik, Almaty aýdanynda – 1300, Baıqońyr aýdanynda – 500, Esil aýdanynda – 2975 aǵash pen 274 buta, Saryarqa aýdanynda 495 kóshet otyrǵyzylǵan. Senbilikte tús áletinde 687,88 tonna qaldyq jınalyp, qoqys jınaý aýmaǵyna shyǵaryldy. Barlyǵy 166 tasymal atqaryldy. Atap aıtqanda, qoqys jınaý men shyǵarý isine 200 traktor men 387 júk kóligi jumyldyryldy. Elorda ishin qaq jaryp aǵatyn Esil ózeni men onyń Aqbulaq, Sarybulaq ispetti salalarynyń jaǵalaýlary sanıtarlyq tártipke keltirildi. Atalǵan aksııaǵa L.N.Gýmılev atyndaǵy Eýrazııa ulttyq ýnıversıtetiniń 150-den astam stýdenti men qala aýmaǵynda áskerı mindetin atqaryp júrgen azamattar belsene qatysty. Sondaı-aq senbilikte turǵyndarǵa tazalaýǵa qajetti zattar úlestirildi.
«Qalamyzdyń tazalyǵy balalarymyzdyń densaýlyǵy úshin óte mańyzdy. Mundaı sharalardyń jıi uıymdastyrylyp turǵanyn qalaımyn. О́ziń turatyn qalanyń jarqyrap, jaınap turǵany barshamyzǵa unaıdy. Sondyqtan tazalyq-sanıtarlyq sharalaryn saqtaý, qalany taza ustaýǵa árqaısymyzdyń qosar úlesimiz úlken» deıdi Almaty aýdanynyń turǵyny, zeınetker Q.Toqseıitova.
Ekologııalyq aılyqqa mınıstrlik, agenttik ujymdary men qalalyq máslıhat, qala ákimdiginiń apparaty, ortalyq atqarýshy organdardyń aýmaqtyq bólimsheleriniń qyzmetkerleri, ardagerler keńesi, kásipodaqtar men qoǵamdyq uıymdardyń da ókilderi belsendi túrde qatysqanyn atap ótýge bolady. Shaǵyn jáne orta kásipkerlik ıeleri ózderine tıesili aýmaqtyń tazalyǵyn qamtamasyz etse, kommýnaldyq qyzmet pen merdiger uıymdar aýlaishilik kóriktendirý jumystaryn júrgizip, balalardyń oıyn alańdary men sport alańdaryn, tastaqtalar men jıektastardy jańartýǵa qatysty. Sonymen birge ınjenerlik jáne kommýnıkasııalyq jelilerdi jóndeýden ótkizý kezinde buzylǵan aýmaqtar, kabeldi jeliler, kóshedegi jáne saıabaqtardaǵy jaryqtandyrý retke keltirildi.
Ekologııalyq sharaǵa «Astana EKSPO-2017» ulttyq kompanııasy da qatysty. Olar kórme kesheniniń nysandary men saıabaq mańaıyndaǵy 2 gektarǵa jýyq alańdy tazalap, 200 kóshet otyrǵyzdy. Sondaı-aq 7 arnaıy tehnıkany jumyldyryp, 3 tekshe metr qoqys shyǵardy. «Ujymymyz tolyq qurammen jalpyqalalyq senbilikke shyqty. Kórme murasy nysandary Astana turǵyndary men qonaqtarynyń jıi keletin ortalyǵyna, al «Nur Álem» sferasy – jańa dúnıejúzilik bolashaq energııasynyń nyshanyna aınaldy. Qazir kórme aýmaǵyna kelýshilerdiń jaılylyǵy úshin EKSPO nysandaryn qaıta jóndeý jáne kórkeıtý jumystaryn atqaryp jatyrmyz», dedi kásiporyn basshysy Erbol Shormanov.
Senbilik sharalary el aýmaǵynda da ótýde. Al «Astana – taza ári qaýipsiz qala» atty jalpyqalalyq senbilik 12 mamyrda taǵy da uıymdastyrylmaq.
Dýman ANASh,
«Egemen Qazaqstan»
