Elbasy, «Nur Otan» partııasynyń Tóraǵasy Nursultan Nazarbaevtyń tapsyrmasy boıynsha búginde partııa qyzmetin jańǵyrtý jumystary qarqyndy júrgizilýde. Osy baǵytta birqatar naqty strategııalyq jobalar qolǵa alynyp, olardy júzege asyrýdyń tıimdi tetikteri de qarastyrylǵan. Atalǵan jobalardyń máni men mańyzy týraly aıtqan Máýlen Áshimbaev olardyń el damýyna tıgizer oń áserin de atap ótti.
«Partııa qolǵa alǵan jańa jobalardyń qatarynda sıfrlandyrýdy júzege asyrý, shaǵyn jáne orta bıznesti qoldaý jáne «Rýhanı jańǵyrý» baǵdarlamasyna úles qosýǵa baǵyttalǵan tyń bastamalar bar. Bul jobalar aldymyzda turǵan eń basty maqsat – eń damyǵan 30 eldiń qataryna qosylýǵa jáne qazaqstandyqtardyń álemdik básekege qabilettilikterin arttyrýǵa óz septigin tıgizedi», – dedi «Nur Otan» partııasy Tóraǵasynyń birinshi orynbasary.
M.Áshimbaevtyń aıtýynsha, partııalyq jańǵyrý aıasynda aldaǵy ýaqytta elimizde balalarǵa arnalǵan 1000 IT-synyp ashylyp, onda jylyna 150 myń mektep oqýshysy baǵdarlamalaý jáne robot-tehnıkanyń negizderi jaıynda tereńdetilgen bilim almaq. Sondaı-aq partııanyń bastamasymen jumys berýshi IT-kompanııalar men iri joǵary oqý oryndarynyń bazasynda 20 IT-ortalyq ashylady. Onda jylyna 35 myń qazaqstandyq IT-ındýstrııanyń qyr-syryn úırenetin bolady. Osylaısha «Nur Otan» partııasy «Atameken» ulttyq kásipkerler palatasymen birlesip qazaqstandyqtardyń sıfrly saýattylyǵyn arttyryp qana qoımaı, olardyń álemdik iri jobalarǵa qatysatyn básekege qabiletti maman bolyp qalyptasýyna jaǵdaı jasamaq.
Shaǵyn jáne orta bıznesti qoldaý maqsatynda «Nur Otan» partııasy «Atamekenmen» birlesip kásipkerlerge arnalǵan Biryńǵaı geoaqparattyq onlaın qyzmet usynatyn portal qurýdy josparlap otyr. Onyń basty maqsaty – kásipkerlik saladaǵy memlekettik qyzmetterdi elektrondy formatqa kóshirý, damyǵan elderdiń eń úzdik úlgilerin engizý jáne bıznestegi shyǵyndardy azaıtý. Partııa tarapynan óńirlerde memleket-jekemenshik áriptestigin odan ári nyǵaıtýǵa baǵyttalǵan jumystar da qarqyndy júrgizilmek. Sol arqyly mektep ashanalarynyń jumysy jandanyp, sport alańdary qaıta qalpyna keltiriledi.
«Rýhanı jańǵyrý» baǵdarlamasy boıynsha da partııa birqatar basym baǵyttardy qolǵa alǵan. Bul rette aýyldyq jerlerde aǵylshyn tilin úırenýge qolaıly orta qalyptastyrýǵa jáne elimizde eriktiler qozǵalysyn damytýǵa basymdyq berilip otyr. Soǵan baılanysty aǵylshyn tilin erkin meńgergen 500 qazaqstandyq jáne sheteldik jas erikti aýyldyq mektepterge jiberilip, olar arnaıy qurylǵan klýbtarda jergilikti jastarǵa til úıretetin bolady. Osy baǵytta partııanyń bastamasymen otandyq kitaphanalardy zamanaýı bilim ortalyqtary retinde qaıta qurý isi de qolǵa alynbaq. Sonyń nátıjesinde biryńǵaı onlaın kitaphana júıesi qalyptasyp, elimizdegi barlyq kitap qory elektrondy formatqa kóshiriledi. Kitaphanalarda jastarǵa arnalǵan qyzyqty leksııalar uıymdastyrylyp, pikirtalas alańdary jáne taǵy basqa ıgi bastamalar da jumys isteıtin bolady.
– Qazir búkil álem qarqyndy damyp qana qoımaı, jedel ózgerý ústinde. Sondyqtan biz de búgingi zaman talaptaryna saı beıimdelýimiz kerek. Osy maqsatta «Nur Otan» partııasy naqty jobalardy qolǵa alyp, jumysty bastap ketti. Bul jobalardy júzege asyrý múmkindikteri jan-jaqty saraptalyp, tıimdi tetikteri aldyn ala muqııat zertteldi. Partııa osyndaı naqty jobalar arqyly Elbasy aıqyndap bergen maqsat-mindetterdi tabysty júzege asyryp, strategııalyq bastamalarǵa belsene qatysatyn bolady, – degen Máýlen Áshimbaev mundaı aýqymdy jumysty partııa memlekettik organdar, bıznes qaýymdastyq jáne úkimettik emes uıymdarmen birlesip atqaratynyn atap ótti.
Sonymen qatar jıyn barysynda Premer-Mınıstrdiń orynbasary Asqar Jumaǵalıev Elbasy tapsyrmasyna sáıkes «Sıfrly Qazaqstan» baǵdarlamasy bekitilip, 5 naqty baǵyt anyqtalǵanyn tilge tıek etti.
«Olardyń ishinde, adamı kapıtal, sıfrly úkimet, sıfrly ekonomıka, ınnovasııaly ekojúıe jáne sıfrly Jibek joly nemese ınfraqurylymdy damytý bar. Olar halyqtyń ómir súrý sapasyn jaqsartýǵa arnalǵan. Olardyń eń mańyzdysy adamı kapıtal. Adamı kapıtaldyń kómegi arqyly barlyq baǵyt júzege asyrylady. Balalarǵa arnalǵan tegin IT-synyptardyń kóterer júgi salmaqty bolmaq. Bul joba aıasynda elimiz boıynsha 1000 IT-synyptyń, joǵary oqý oryndarynyń bazasynda 20 IT-ortalyq ashylatyny qýanyshty. Biz mundaı bastamalardy qoldaýǵa ázirmiz», dedi Asqar Jumaǵalıev.
О́z kezeginde, «Atameken» UKP basqarma tóraǵasy Abylaı Myrzahmetov te partııalyq bastamalardyń áleýetine nazar aýdaryp, osy jolda bıznes-qaýymdastyq tarapynan meılinshe qoldaý kórsetiletinin aıtty.
Raýan QAIDAR,
«Egemen Qazaqstan»
