«Tarıhy áriden bastalatyn asyq atý oıynynan el birinshiligi 1993 jyldan beri ótkizilip keledi. 2011 jyly ereje bir júıege keltirilip, qarqyndy damý aldy. 2017 jyly IýNESKO-nyń adamzattyń materıaldyq emes mádenı mura tizimine engizildi. Úlkendermen qatar jastardyń da qyzyǵýshylyǵy kúrt artyp otyr», deıdi asyq atý federasııasynyń atqarýshy dırektory Jomart Sabyrjanov.
Eki kúnge sozylǵan básekede erler asyq atyp jaryssa, áıelder jaǵy bes asyqtan kúsh synasty. Ereje boıynsha ár komandadan úsh oıynshydan qatysyp, ózderiniń eptilikterin, kóz mergendigin, dáldigin, jyldamdyǵyn tanytýǵa umtyldy.
Astananyń namysyn qorǵaýǵa kelgen 18 jastaǵy boıjetken Uljalǵas Qudaıberdıeva jas ta bolsa tájirıbesi mol kórinedi. Bir jyldary respýblıkalyq dodada kúmis júldeger atanypty. Kózdegenin múlt jibermeıtin surmergen dersiń. «Asyq oıyny kózdi, qoldy shapshańdyqqa úıretedi», deıdi, ol. Batys Qazaqstan oblysy Aqjaıyq aýdanynda dene shynyqtyrý pániniń muǵalimi bolyp isteıtin Dına Bekmaǵambetova da asyqty kishkentaıynan oınaýdy ádet etipti.
Jarys qorytyndysynda erler arasynda astanalyq sportshylar jalpykomandalyq esepte birinshi oryndy jeńip aldy. Ekinshi, úshinshi oryndardy Qostanaı men Ońtústik Qazaqstan oblysy ıelendi.
Áıelder arasynda taǵy da astanalyqtardyń mereıi ústem boldy. Ekinshi orynǵa alań ıeleri, úshinshi orynǵa Qostanaı oblysy kóterildi.
О́mir ESQALI,
«Egemen Qazaqstan»
