Árıne aty aıtyp turǵandaı, jańa baǵdarlamany oqytý úshin jańa, zamanaýı oqýlyqtar men kórnekilik quraldarynyń qajettigi aıtpasa da túsinikti. Kórnekilik quraldar demekshi, jaqynda oblys ákimi Danıal Ahmetov jumys saparymen Tarbaǵataı aýdanyna baryp, sondaǵy Shoqan Ýálıhanov atyndaǵy mektepti aralaý barysynda bıologııa páni kabınetindegi 80-jyldardaǵy, keńestik zamandy eske salatyn kórnekilik quraldaryna kózi túsip: «Bıyl oblys qazynasynan bilim salasyna ǵana 106 mıllıard teńge qarjy bólindi.
Bul – jergilikti bıýdjettiń úshten bir bóligi. Al mektepterdegi oqý qural-jabdyqtarynyń túri mynaý. Jaýapty tulǵalarǵa tez arada qarajattyń jumsalýyna keshendi tekserý júrgizýdi tapsyramyn», degen-di. Árıne mundaı kórnekilikter jalǵyz Tarbaǵataı aýdanynda ǵana emes, oblystyń ózge aýdandaryndaǵy mektepterde de bolýy ábden múmkin. Tekserý barysynda aıqyndala jatar. Eger oǵan deıin óńirdegi mektepter «ash páleden qash pále» dep ózderinde bar kórnekilikterden qutylyp úlgermese.
Tarbaǵataıdyń atalǵan mektebinde kórnekilik quraldary ǵana emes, bilim ordasynyń óziniń de tozyǵy jetip tur. Aımaq basshysy bul oqý oshaǵyna áýeli keshendi tekserý júrgiziletinin, sodan keıin ǵımaratqa jóndeý jumystary jasalatynyn jetkizdi.
Reti kelgende aıta keteıik, qazir aýdannyń Aqjar aýylynda 600 oryndyq mektep pen 300 oryndyq ınternat salynyp jatyr. Bul nysandar aldaǵy oqý jylynda qoldanysqa berilýi tıis.
Azamat QASYM,
«Egemen Qazaqstan»
Shyǵys Qazaqstan oblysy
