Batys Qazaqstan oblystyq halyq shyǵarmashylyǵy ortalyǵy uıymdastyrǵan bul festıvaldiń maqsaty – mádenı oıyn-saýyq salasynda tájirıbe almasý, úzdik isterdi nasıhattaý, óner adamdary men ujymdar arasynda ózara shyǵarmashylyq baılanys ornatý. Aýyl, aýdan, qala, oblys deńgeıinde úsh kezeń arqyly ótkizilgen baıqaýda jeńimpazdar 16 atalym boıynsha marapattalyp, respýblıkalyq synda oblys namysyn qorǵaıtyn boldy.
– Bul óte mańyzdy shara. Elbasymyzdyń «Rýhanı jańǵyrý» baǵdarlamasy qolǵa alynǵanyna bir jyl ýaqyt ótti. Bul kezeńde az jumys atqarylǵan joq. Muny búgin biz ár aýdannyń atqarǵan jumystary beınelengen kórmeden de kórip otyrmyz. О́tken jyly Syrym aýdanynda Alash mýzeıin kúrdeli jóndeýden ótkizdik. Áıgili kúıshiler Qurmanǵazy men Dınaǵa eskertkish ornattyq. Kúı atasy Qurmanǵazynyń bıylǵy mereıtoıy IýNESKO deńgeıinde atalyp ótedi. Astana qalasynda Mánshúk Mámetovaǵa eskertkish ornatamyz, sonymen birge Oral qalasynda Isataı men Mahambet eskertkishin de bıyl ornatamyz dep sheshim aldyq. Tarıhy tereń, talaı dańqty tulǵalar dúnıege kelgen óńirimizdiń arǵy-bergi tarıhy túgel qamtylatyn kóptomdyq jınaq shyǵaramyz. Mine, bul jumystyń bári bizdiń aýyzbirshiligimizdiń arqasynda, yntymaǵymyzdyń nátıjesinde júzege asyp jatyr. Bolashaqta da oıǵa alǵan jumystarymyzdy birlese atqarýǵa shaqyramyn. «Rýhanı jańǵyrý» baǵdarlamasy aıasynda aıanbaı eńbek eteıik! – dedi óz sózinde Batys Qazaqstan oblysynyń ákimi Altaı Kólginov.
Osy sharaǵa «Qasıetti Qazaqstan» ǵylymı-zertteý ortalyǵy basshysynyń orynbasary Batyrhan Jumabaev arnaıy kelgen edi. Astanalyq meıman óz sózinde qazylar alqasymen birge búgingi baıqaýdyń nátıjesin shyǵaryp, úzdikterdi anyqtaǵan kezde Batys Qazaqstan oblysyndaǵy mýzeı qyzmetkerleriniń ǵylymı izdenisi, kásibıligi óte joǵary bolǵandyǵyn aıtyp ótti.
Sonymen, Batys Qazaqstan oblysyndaǵy eń úzdik aýdandyq mýzeı – Syrym aýdanyndaǵy Syrym Datuly mýzeıi (meńgerýshisi A.Oıshybaeva), eń úzdik oblystyq mýzeı – «Bókeı ordasy» tarıhı mýzeı-kesheni bolyp tanyldy. «Úzdik aýdandyq mýzeı qyzmetkeri» ataǵyna – Bórli aýdandyq ólketaný mýzeıiniń meńgerýshisi Altynbóbek Súıindikov, «Úzdik oblystyq mýzeı qyzmetkeri» ataǵyna Jáńgir han atyndaǵy tarıhı ólketaný mýzeıiniń meńgerýshisi Nurjan Tólepov ıe boldy.
Kitaphana júıesi de osy festıval aıasynda eńbek úzdikterin sarapqa salǵan edi. Baıqaý qorytyndysynda Bórli aýyldyq kitaphanasy – «Úzdik aýyl kitaphanasy» atalymyna, Syrym aýdandyq ortalyq kitaphanasy – «Úzdik aýdandyq kitaphana», J.Moldaǵalıev atyndaǵy oblystyq ámbebap ǵylymı-kópshilik kitaphana «Úzdik oblystyq kitaphana» ataǵyna laıyq dep tanyldy. Jekelegen kitaphana qyzmetkerleri arasynda Laýra Berdiǵalıeva (Qaztalov aýdany, Qaraoba aýyldyq kitaphanasy), Aınagúl Batyrhanova (Bókeı ordasy aýdandyq kitaphanasy) jáne Sergeı Bykov (H.Esenjanov atyndaǵy oblystyq balalar men jasóspirimder kitaphanasy) jeńimpaz atandy.
Mádenıet úıleri arasynda ótken saıysta Zelenov aýdanyndaǵy Iаnvarsev aýyldyq klýby – «Úzdik aýyldyq klýb», Qaztalov aýdany Jalpaqtal aýyldyq Mádenıet úıi – «Úzdik aýyldyq Mádenıet úıi», Bórli aýdandyq Mádenıet úıi – «Úzdik aýdandyq Mádenıet úıi», Oral qalalyq Jastar Mádenıet úıi – «Úzdik qalalyq Mádenıet úıi» atandy. Terekti aýdany Aqsoǵym aýyldyq klýb meńgerýshisi Almash Arystanova – «Úzdik aýyldyq klýb qyzmetkeri», Qaztalov aýdany Aqpáter aýyldyq Mádenıet úıiniń dırektory Marat Hasanov – «Úzdik aýyldyq Mádenıet úıi qyzmetkeri», Shyńǵyrlaý aýdandyq Mádenıet úıiniń dırektory Gúljamal Jumaǵazıeva – «Úzdik aýdandyq Mádenıet úıi qyzmetkeri» degen dıplomdar men arnaıy syılyqqa ıe boldy. Bul atalǵan jeńimpazdardyń bári de respýblıkalyq baıqaýǵa joldama alyp, baq synaıtyn boldy.
El ishinde óner men mádenıetti nasıhattap, halyqtyń maǵynaly da mándi demalysyn uıymdastyryp júrgen, bylaıǵy ýaqytta kóp elene bermeıtin qarapaıym mádenıet qyzmetkerleriniń abyroıy asqaqtaǵan kún boldy. Festıvalge qatysýshylar shara sońynda estelik sýretke túsip, ár aýdannyń mádenıet pen óner salasyndaǵy úzdik jetistikteri beınelengen kórmeni tamashalady.
Qazbek QUTTYMURATULY,
«Egemen Qazaqstan»
Batys Qazaqstan oblysy
Sýretti túsirgen
Aıbatyr NURASh
