Eki qurama arasyndaǵy teketirestiń birinshi kezeńi 1:1 esebimen teń aıaqtaldy. Matchtyń úshinshi mınýtynda Ulybrıtanııa quramasynyń oıynshysy Lıýk Ferrar esepti ashyp, komandasyn alǵa shyǵarsa, 15-mınýtta qazaqstandyq hokkeıshi Dmıtrıı Grens tarazy basyn teńestirdi.
Oıynnyń ekinshi kezeńin Qazaqstan quramasy nátıjeli bastap, basymdyqty óz qoldaryna aldy. Matchtyń 33-mınýtynda Anton Sagadeev shaıbany alystan baǵyttap, qaqpany dál kózdegen bolatyn. Alaıda Ulybrıtanııa quramasynyń bapkeri soǵylǵan shaıbaǵa óziniń narazy ekenin, erejege saı soǵylmaǵanyn aıtyp, tóreshilerden sol sátti vıdeodan qaıtalaýyn kórýdi talap etti. Nátıjesinde, tóreshiler shaıba soǵylǵan kezdi qaıta qarap, Sagadeevtiń shaıbasyn esepke aldy. Arada eki mınýt ótken soń Roman Starchenko esepti 3:1-ge jetkizdi.
Úshinshi kezeńde Qazaqstan quramasy brıtanııalyqtardyń qaqpasyna jaýapsyz úsh shaıba soqty. 42-mınýtta Roman Starchenko dýbl jasasa, 46-mınýtta Nıkıta Mıhaılıs mergendigimen kózge tústi. Al altynshy shaıbany quramamyzdyń jas oıynshysy Álıhan Ásetov soqty. Qorytyndy esep – 6:1.
Eki oıynda da jeńiske jetken Qazaqstan quramasy alty upaı jınap, I dıvızıonynyń «A» tobynda birinshi orynda keledi. Eki matchta úsh upaı jınaǵan Italııa, Polsha, Vengrııa jáne Ulybrıtanııa quramalary ekinshi men besinshi oryndardy ózara bólisip tur. Al múlde upaıy joq Slovenııa hokkeıshileri sońǵy altynshy orynda.
Aıta keteıik, chempıonat qorytyndysy boıynsha birinshi jáne ekinshi orynǵa qol jetkizgen quramalar «A» tobynyń joǵary dıvızıonyna, ıaǵnı TOP dıvızıonda oınaýǵa múmkindik alady.
Ulybrıtanııaǵa qarsy oınaǵan Qazaqstan quramasynyń oıynshylar tizimi: Karlsson – Semıonov-Dallmen, Starchenko-Kýchın-Rymarev; Lakıza-Metalnıkov, Mıhaılıs-Grens-Evdokımov; Polohov-Orehov, Akolzın-Sagadeev-Markelov; Ybyraıbekov-Petýhov, Ásetov-Gýrkov-Volkov.
Bet qattalyp jatqanda: Keshe keshkisin Qazaqstan quramasy ıtalııalyq hokkeıshilermen kezdesip, 0:3 esebimen utylyp qaldy. Oıyn týraly tolyǵyraq erteńgi nómirde jarııalanady.
Álı BITО́RE,
«Egemen Qazaqstan»
