– Bul kórmeniń maqsaty – osy zamandaǵy álemdegi eń talantty sýretshilerdi toǵystyrý. Olardyń shyǵarmashylyǵyn bezbendeý arqyly óner týyndylaryna jol ashý. Kórmeniń alǵashqy kúnine ataqty ónertanýshylar, mýzeıler men galereıalardyń basshylary, qaltaly kolleksıonerler, óner deldaldary qatysyp, sýretshilerdiń deńgeıine baǵa berip, unaǵan týyndylardy satyp alady.
Joly bolǵan qylqalam sheberleri qymbat tapsyrystar alyp, tıimdi kelisimsharttarǵa otyrady. «Artexspo New York» kórmesiniń ekinshi kúni búkil sán-saltanatymen, úlken konsertpen ashylyp, 5 kúnge jalǵasady. Osy aralyqta sýretshilerdiń bolashaǵyna jol ashatyn óte úlken múmkindikter týady. Kórmeden alyp júrgen áserimdi birneshe sóılemge syıǵyza almaımyn. Álemniń ár shalǵaıynan iriktelip shaqyrylǵan, 3 myńǵa tarta sýretshi qatysyp jatqan kórmeniń zaldary óte úlken, aýqymy keń ári ásem, deıdi Qazaqstan Sýretshiler odaǵynyń múshesi, Atyraý oblysynyń mádenıet qaıratkeri Kámıla Japalova.
Nıý-Iorkte qazaqy naqyshtarǵa saltanat qurǵyzǵan qazaq qyzy kórmedegi árbir jumysty keleshektiń qundy jádigeri dep esepteıdi. Jáne Kámıla bul oqıǵanyń qııalyna shabyt qosyp, jaryqqa qaıtalanbas týyndylar ákeletinine senimdi.
– Kórmedegi ertegideı ǵajaıyp álemge, Nıý-Iorktiń haýs tirshiligine, qalanyń kóz toımas túngi kórinisterine sapar shege otyryp, ómirlik shyǵarmashylyq azyq jınadym. Sheteldik áriptesterimmen bólisken áserler tájirıbemdi baıytty. Shyǵarmashylyq qorjynǵa jınaǵan baılyqty óz shákirtterimmen bólisýdi borysh sanaımyn. Kez kelgen sýretshige buıyra bermeıtin álemdik kórmeniń bir bólshegi bolǵanym úshin ózimdi óte baqytty sezinip júrmin, – depti jerlesimiz AQSh-tan joldaǵan hatynda.
Aınash ESALI,
«Egemen Qazaqstan»
ALMATY
