Bul máseledegi basty nazar, onyń basty mindeti joldaǵy balalar jaraqatynyń aldyn alý, balalar men jasóspirimder arasynda Jol qozǵalysy erejesin saqtaýdy nasıhattaý bolyp tabylatyn jol qozǵalysy jas ınspektorlarynyń mekteptegi toptarynyń qyzmetin uıymdastyrýǵa baǵyttalady.
Jas ınspektorlar qozǵalysy toptarynyń qyzmetin jetildirý, sonymen qatar balalar jol-kólik jaraqatynyń aldyn-alý jumysyn jandandyrý maqsatynda 2018 jyldyń 15 mamyrynda Aqtaý qalasyndaǵy №8 I. Súıeýbaev atyndaǵy orta mektepte oblystyq mamandandyrylǵanmektep-ınternatynyń bazasynda oblystyń IID Jergilikti polısııa qyzmetiniń Bilim basqarmasymen birlesken Ǵazız Baıtasov atyndaǵy jol qozǵalysy jas ınspektorlarynyń 18-shi oblystyq sleti ótkizildi, onda oblystyń JIQ-nyń qalalyq jáne aýdandyq jeńimpazdary – 7 komanda qatysty.
Sletke qatysýshylar saptyq baıqaý, jol qozǵalysy erejesiniń bilgirleri, velosıpedti mánerlep júrgizý, jas retteýshi, jas sanıtar,úgit-nasıhat toptarynyń baıqaýy, tapqyrlar (erýdıtter) týrnıri, "Ashyq úzilis" baıqaýy baǵyttary boıynsha synǵa tústi.
Baıqaý nátıjesinde jalpy komandalyq birinshilikte 1-shi oryndy №5 mektep oqýshylarynan quralǵan Munaıly aýdanynyń komandasy ıelendi.
2-orynǵa Aqtaý qalasynyń komandasy, №8 orta mektep, 3 orynǵa Mańǵystaý aýdanynyń Jyńǵyldy selosyndaǵy E.Aıshýaquly atyndaǵy orta mekteptiń komandasy ıe boldy.
Oblystyq slettiń jeńimpazy – Munaıly aýdanynyń №5 orta mektebiniń komandasy Qyzylorda qalasynda 20-29 tamyz aralyǵynda ótetin respýblıkalyq slette Mańǵystaý oblysynyń atynan óz bilimderi men sheberlikterin kórsetetin bolady.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
