Sheberlik-dárisi aıasynda elimizde alǵash ret retınoblastomaǵa shaldyqqan balalarǵa selektıvti ıntraarterıaldy hımıoterapııa (SIAHT) júrgiziledi jáne QR azamattaryn shetelge emdelýge jiberý máselesi boıynsha jumys organyna ótinim bergen naýqastarǵa ota jasalynatyn bolady.
Kóz ishi qaterli isigi- retınoblastomany emdeýdiń organsaqtaýshy ádisin engizý, ıaǵnı bul otany jasaý balalardyń kózderin saqtap qalýǵa múmkindik beredi. Otanyń ereksheligi de osynda.
Sheberlik-synybyn ótkizýge jáne retınoblasto-kóz ishi qaterli isigine shaldyqqan tórt balaǵa SIAHT operasııasyn jasaý úshin Reseıden N.N.Blohın atyndaǵy Onkologııalyq ulttyq medısınalyq zertteý ortalyǵynyń (Máskeý q.) dárigerleri – angıohırýrg I.A.Trofımov jáne anestezıolog L.A.Martynov arnaıy shaqyryldy. Sharaǵa sheberlik-synybynyń tyńdaýshylary retinde Qazaqstan Respýblıkasynyń barlyq óńirlerinen onkolog dárigerler, pedıatrlar men oftalmologtar qatysady.
Balalarda kezdesetin kóz ishi isiginiń arasyndaretınoblastoma 90 paıyzdy quraıdy jáne joǵary qaterliligimen sıpattalady. Jyl saıyn álemde retınoblastomanyń 8100 jańa jaǵdaıy anyqtalady, onyń ishinde 570-810 jaǵdaı nárestelerde kezdesedi. Retınoblastoma kóz almasynyń bárin isik tinderimen basyp, kórý júıkesine, kóz uıasyna, bas mıyna ósip shyǵatyn agressıvtiligimen baıqalady. Bul isik tek kórý qabiletinen aıyryp qana qoımaıdy. Sonymen qatar metastazdyń jáne basqa aǵzada da ekinshi qaterli isiktiń damýy saldarynan ólim-jitimniń joǵarylyǵymen qaýipti.
Elimizde 2016 jyldan beri retınoblastoma dıagnozymen anyqtalǵan barlyq balalar QR Densaýlyq saqtaý mınıstrliginiń Pedıatrııa jáne balalar hırýrgııasy ǵylymı ortalyǵynda em alady.
Qazaq kóz aýrýlary ǵylymı-zertteý ınstıtýty osy atalǵan tehnologııany Qazaqstanda engizýge bastama kóterip otyr. Sonymen qatar, ony kepildi kólemdegi tegin medısınalyq kómekke qosýǵa usynýda. SIAHT ádisi jáne basqa da emdeýdiń organsaqtaýshy ádisteri engizilgen «Balalardaǵy retınoblastoma» klınıkalyq hattamasy qaıta qaraýǵa ázirlendi. QR Densaýlyq saqtaý mınıstrligi bekitkennen keıin SIAHT ádisi balalar onkologııalyq qyzmeti men ıntervensııalyq hırýrgııa shoǵyrlandyrylǵan jáne retınoblastomaǵa shaldyqqan barlyq balalarǵa negizgi em jasalynatyn QR Densaýlyq saqtaý mınıstrliginiń Pedıatrııa jáne balalar hırýrgııasy ǵylymı ortalyǵynyń praktıkasyna engiziletin bolady.
Aınash ESALI,
«Egemen Qazaqstan».
ALMATY
