Almatydaǵy Dostyq úıinde qalamgerler qaýymymen kezdesken Prezıdent Ákimshiligi ishki saıasat bóliminiń meńgerýshisi Aıda Balaeva elimizdiń baı ádebı murasyn álem halqyna tanytýda bul bastamanyń orny aıryqsha ekenin aıtyp, «Rýhanı jańǵyrý» baǵdarlamasy boıynsha jyl kóleminde atqarylǵan jumystardyń nátıjesine toqtaldy.
– Jýyrda ǵana 100 oqýlyq jobasynyń negizinde aýdarylǵan 18 kitaptyń tusaýy kesildi. Ekinshi kezeńde taǵy da 30 kitap aýdarylýǵa daıyn. Bul halqymyzdyń bilim kókjıeginiń keńeıýine ǵana emes, memlekettik tilimizdiń mártebesin kóterýge de yqpal bolǵan ıgi bastama dep esepteımiz. «Jahandaǵy zamanaýı Qazaqstandyq mádenıet» jobasy aıasynda tuńǵysh ret táýelsizdik dáýirindegi búkil óner toptalyp, túgendelip tizimi jasaldy. Endigi kezekte 500-ge jýyq irgeli shyǵarmany iriktep, álemdik naryqqa nasıhattaýǵa kirispekpiz. Elbasy aıtqandaı qoǵamdyq sanany jańǵyrtyp, ony túbegeıli ózgertýde zııaly qaýym ókilderiniń úlken jaýapkershiligi jatyr. Sondyqtan baǵdarlamanyń ekinshi kezeńinde Qazaqstan Jazýshylar Odaǵy bastaǵan qalamgerler qaýymymen birlese jumys isteımiz degen oıdamyz. Tól mádenıetimiz ben ádebıetimizdi álemge áıgileý úshin qazaqstandyq proza men poezııa antologııasyn qurastyryp, olardy aǵylshyn, fransýz, ıspan, qytaı jáne orys tilderine aýdarý isin qolǵa aldyq. Bul jaı ǵana jalań aýdarma jasap kitap shyǵarý degen maqsat emes. Maqsatymyz mádenıet salasyndaǵy halyqaralyq qarym-qatynastardy nyǵaıtý, onyń aýqymyn keńeıtý, ádebıetimizdi álemdik naryqqa shyǵaryp dúnıejúzine tanystyrý, – deıdi Aıda Balaeva.
Álemniń ár qıyryna taraıtyn qazaq prozasy men poezııasy antologııasyna 30 aqyn men 30 jazýshynyń táýelsizdik dáýirinde jazylǵan otty shyǵarmalary enbek. Ázirge eńbegi jınaqqa enetin qalamgerlerdiń tizimi anyqtalýda. Zııaly qaýym ókilderiniń sózinshe, shet tilderine aýdarylatyn shyǵarmalar qazaq ádebıetiniń bıik óresin tanytatyn shoqtyǵy bıik týyndylar bolýǵa tıis. Basqosý barysynda aqyn-jazýshylar tarapynan osyǵan qatysty naqty usynys pikirler de aıtylmaı qalǵan joq.
О́z kezeginde Qazaqstan Jazýshylar Odaǵynyń basqarma tóraǵasy Ulyqbek Esdáýlet jobany oıdaǵydaı júzege asyrý barshaǵa ortaq mindet ekenin jetkizip, ult ádebıetine tanytqan janashyrlyǵy men qoldaýy úshin Prezıdent ákimshiligine barsha qalamgerler atynan alǵys sezimin bildirdi.
Arman OKTIаBR,
«Egemen Qazaqstan»
ALMAT
